NFA nidiskarga na sa 35 mil ka sakong bugas alang sa Sugbo

CEBU, Philippines — Nagsugod na ang National Food Authority (NFA) sa pagdiskarga og 35,000 ka sako sa well-milled nga bugas sa Sugbo niadtong Lunes, gikan sa Mindoro isip kabahin sa pilot run sa P20-per-kilo nga programa sa bugas sa Kabisay-an.

Sumala sa NFA, ang mga probinsya sa Sugbo, Bohol, Siquijor, ug Southern Leyte nga miuyon nga moapil sa subsidized rice initiative, adunay inisyal nga hiniusang order nga 673,000 ka 50-kilo nga sako sa bugas alang sa pilot test nga molungtad hangtud sa Disyembre 2025.

Si NFA Administrator Larry Lacson niingon nga ang mga kargamento kabahin sa 600,000 ka sako sa bugas nga gi-order ni Cebu Governor Gwendolyn Garcia alang sa “Benteng Bigas, Meron Na!” o BBM Na! rice program sa probinsiya.

Matud sa NFA, ang Siquijor mi-order og 40,000 ka sako sa bugas, ang Southern Leyte mi-order og 30,000, ug ang Bohol nga 3,000 ka sako.

Gilauman nga ang pag-transfer sa mga bugas paingon sa Sugbo mahuman sa Hunyo, diin ang 240,000 ka sako maggikan sa mga bodega sa NFA sa Mindoro ug Iloilo.

Samtang, ang BBM Na! usa ka subsidized rice program sa Department of Agriculture, pinaagi sa Food Terminal Inc. (FTI), ug local government units (LGUs) nga moabaga sa P13 nga gintang sa presyo tali sa subsidized rate ug sa kasamtangang presyo sa merkado aron itanyag ang bugas sa tag P20 matag kilo gamit ang NFA stocks nga gipalit gikan sa mga lokal nga mag-uuma sa P18 ngadto sa P24 matag kilo.

Saysay pa ni Lacson nga gikinahanglan ang decongestion sa mga bodega sa NFA aron mapadayon ang pagpamalit og humay gikan sa mga lokal nga mag-uuma.

Hangtud Abril 30, ang national rice inventory sa NFA nikabat sa 7.93 milyones ka sako nga katumbas sa 10 ka adlaw nga konsumo sa bugas sa nasud. (BANAT NEWS)