Taas nga voter turnout natala sa Comelec sa CV

CEBU, Philippines —  Nakab-ot sa Central Visayas ang taas nga voter turnout sa pagtapos sa May 2025 midterm elections diin kapin sa 3.7 million voters ang nisalmot nga dunay 86.52 percent turnout rate.

Ang maong turnout milabaw sa miagi nga eleksyon sa 2022 presidential elections ug 2019 midterm polls.

Si Commission on Elections Central Visayas (Comelec-7) regional director Atty. Francisco Pobe mipadayag sa maong kalamposan atol sa Regional Joint Security Control Center (RJSCC) exit conference nga gipahigayon sa dakbayan sa Sugbo.

"This is the highest turnout we've had so far. Even better than in 2022 and 2019," suma pa ni Pobe.

Gihimug-atan ni Pobe nga ang maong kalamposan naggumikan sa pagsalmot sa katawhan sa nagkalain-laing inisyatiba lakip na sa information campaigns, ang sayong pagbotar sa ubang sector ug ang pagpatuman sa mall voting sa mga pinili nga presincts.

Taliwa sa dyutay nga pagkubos sa gidaghanpn sa number of registered voters sa 2025 gumikan sa pagtangtang sa Siquijor ug Negros Oriental, nga karon kabahin na sa bag-ong naumol nga Negros Island Region (NIR), apan ang turnout nagpabilin nga lig-on.

Sama na lang sa Cebu Province, diin siyam ka municipalities nga gitahu ang voter turnout nga niabot og 90 percent o taas pa.

Kini mao ang mga municipalities sa Asturias, Badian, Borbon, Catmon, Dalaguete, Moalboal, Tabogon, Tabuelan, ug Samboan.

Ang Bohol nakatampo og 82,209 early voters samtang ang Cebu nakatala og kapin sa 210,000 ang nakapahimulos sa early voting window.

Giklaro usab ni Pobe ang malinawon ug hapsay nga pagpahigayon sa piniliay sa Central Visayas, diin walay nahitabong election failures ug walay gitahu nga mga dagko nga technical issues.

Nagkanayon usab si Pobe nga lakip sa nakahatag og kalamposan sa eleksyon mao ang hugot nga koordinasyon sa national ug lokal nga ahensya sa gobyerno sama sa RJSCC, PNP, AFP, DepEd, DOJ, ug DOH.

giila usab niini ang kontribusyon sa civil society groups ug watchdogs sama sa Philippine Information Agency, Parish Pastoral Council for Responsible Voting (PPCRV), National Movement for Free Elections (NAMFREL), ug Cebu-Citizens Involvement and Maturation in People’s Empowerment and Liberation (C-CIMPEL).

Gidayeg usab niini ang mga poll workers, ilabina ang mga magtutudlo gumikan sa ilang dedikasyon sa trabaho sa tibuok adlaw sa eleksyon hangtud na sa proklamasyon.