Gisugyot nga across-the-board minimum wage hike dili haum

CEBU, Philippines — Posibleng moresulta sa pagtaas sa inflation ingon man makadaot sa ekonomiya ug gagmay`ng negosyo ang gisugyot nga across-the-board minimum wage hike.

Kini ang pasidaan sa Department of Trade and Industry (DTI) ug Bangko Sentral ng Pilipinas (BSP).

Sa usa ka press release, ang Department of Budget and Management miingon nga ang economic team sa nasud misumiter og joint position paper ngadto kang Presidente Ferdinand R. Marcos Jr. nga nagpasidaan sa delikadong epekto sa nag-ung-ong nga lehislasyon nga P200 minimum wage hike ubos sa House of Representatives bill ug P100 ubos sa Senate bill.

Base sa position paper, gibana-bana sa mga economic manager nga ang P200 nga usbaw sa suholan makadugang og gibana-bana nga 2 percentage points(ppts) sa inflation, samtang ang P100 nga umento makapataas niini og 0.7 ppts.

Mamahimo kining mosangpot sa pagtaas sa presyo sa mga palaliton ug serbisyo, nga makaapekto sa tanang konsumidor, ilabina sa mga marginalized sector ug "poorest of the poor" nga wala masakop sa usbaw sa suholan.

Dugang pa nila nga ang usa ka uniform wage hike dili angay kay wala kini naglantaw sa kalahi-an sa matag region ug mahimong makaapekto sa mga pobre nga lugar nga dunay huyang nga mga ekonomiya tungod kay kini makapugong sa pagsulod sa bag-ong mga investment.

Tungod niini nga mga kabalaka, ang mga economic managers mirekomendar sa paghupot sa kasamtangang sistema diin ang Regional Tripartite Wages and Productivity Boards (RTWPBs) maoy mag-adjust sa suholan base sa lokal nga kahimtang sa ekonomiya ug labor market realities. (BANAT NEWS)