Unang adlaw sa Balik-Eskwela hapsay ra

CEBU, Philippines — Gihulagway sa Cebu City Police Office nga hapsay ug malinawon ra ang pagbukas ang unang adlaw sa klase sa siyudad sa Sugbo kagahapon, Hunyo 16, 2025.

Sayo pa lang sa buntag gipakatap na ang mga polis sa CCPO sa mga pampublikong tunghaan sa dakbayan subay na sab sa gipatuman nila nga seguridad sa pagbukas sa klase.

Nagkanayon si Police Lieutenant Colonel Maria Theresa Macatangay, Deputy City Director for Operations ug tigpamaba sa Cebu City Police Office nga wala sila'y nadawat nga report nga dunay mga nabiktima sa krimen.

Si CCPO Acting City Director Police Colonel Enrico Figueroa mitahas sa mga police stations nga mobantay gawas sa mga tunghaan aron masiguro wala'y kakulian nga motumaw.

Una nang nagbutang og Police Assistance Desk ang CCPO gawas sa mga tunghaan aron daling maduolan sa mga tawo o kaha mga ginikanan kun dunay mga reklamo o emerhensiya.

Matod ni Macatangay huwaton sa mga polis nga makasulod na ang tanang estudyante una pa sila moadto sa ilang beat patrolling ug mobalik na usab inig hapon nga tinggawas sa mga tinun-an.

Gipahibawo sa kapulisan sa siyudad sa Sugbo ang publiko nga kun dunay krimen nga ilang makita mamahimong modiretso sila og tawag sa PNP hotline nga mao ang 911 ug sulod sa 5 minutos mo responde gilayon ang pulis. "They can contact us anytime so that we can provide a necessary assistance they are required," sigon ni Macatangay.

Sa pikas bahin, kapin 100,000 ang naka-enroll nga mga estudyante karong tuiga dinhi sa Dakbayan sa Sugbo itandi sa miaging tuig School Year 2024–2025 nga og 238,413 ka estudyante ang naka-enroll sa tibuok syudad.

Sa pagkakaron, adunay 122,234 ka enrollees sa tanang lebel, apan padayun pa kining madungagan sa mga mosunod nga mga adlaw.

Dili pwedeng balibaran sa mga publikong eskwelahan hangtud Hunyo 30  ang  gustong mo-enroll bisan pa man sa problema sama sa kakuwangon sa mga bangko ug lamesa.

Hinuon, paigo ra gidaghanon sa mga magtutudlo sa Cebu City apan padayon gihapon sila sa pagdawat og mga aplikante.

Sa laing bahin, nakabangon na ang Napo Elementary School sakop sa Barangay Sapangdako ning Dakbayan sa Sugbo, human nasunog ang dili mominos siyam ka lawak saringan nila sa nilabay nga Enero 24, 2024.

Ang Napo Elementary School, nahimutang kini sa bukiran nga barangay sa siyudad sa sugbo nga mao ang Barangay sapangdako.

Ang maong problema kay inanay nga nahatagan ug kasulbaran human sila nibangon ug nibalik sa normal ang ilang klase matud pa sa prinsipal nga si Babylin Palban.

Matud pa ni Palban, atol sa pagbukas sa klase wala na sila nagkuwang og classrooms, apan duna pay tulo nga tiwasonon sa pagtrabaho ug humanon duha ngadto sa tulo ka buwan gikan karon.

Sa laing bahin, gawas sa mga problemang nasugatan diha sa mga eskuylahan, nagkaproblema sab sa kahuot sa trapiko sa mga kadalanan duol sa mga tunghaan kagahapon. Pipila ka mga tulonghaan sa Dakbayan sa Talisay sama sa gawas sa Talisay City Central Elementary School nag-abot ang mga e-bike, tricycle, mga pribadong sakyanan ug uban mga PUVs. Mao sab kini ang nahitabo sa Barangay Cansojong.

Matud pa ni City Of Talisay Traffic Operation Development Authority Chief Jonathan "Joy" Tumulak nga gipaabot nalang nila nga mahuman ang enrollment ug aduna na usab mapili nga bag-ong mga PTA Officer aron ilaha maestoryahan uban ang mga kadagkuan sa eskwelahan para mahatagan ug solusyon ang problema sa trapiko. Sa pagka karon sumala pa ni Tumulak, iyang gihangyo ang mga barangay kapitan sa pagpatabang sa ilang mga barangay tanod sa pag man sa traffic uban sa gi deploy nga mga sakop sa CTTODA.

Si Tumulak niawhag sa mga ginikanan nga adunay mga motor nga mohatud sa ilang mga anak nga dili magpataka ug parking aron dili makamugna og traffic. — Christyll Y. Tecson, CNU Intern/IBM (BANAT NEWS)