Manghod napusilan sa maguwang tungod sa password sa cellphone

CEBU, Philippines — Angol ang usa ka manghod human kini gipusil sa iyang maguwang kay gigukod niya og sundang sa Sitio Kapasad, Barangay Dumlog, dakbayan sa Toledo niadtong Lunes sa buntag, Hunyo 23, 2025.

Ang biktima mao si Erenio Lazaga Tanajora, 33, samtang ang suspek mao ang maguwang niini nga si Jerwin Lazaga Tanajora, 37, ang duha pulos residente sa maong lugar.

Sa imbestigasyon sa Toledo City Police Station ang biktima nagkalalis sa kaipon sa niini gumikan sa password sa cellular phone.

Ang suspek nga maguwang nipatunga apan nasuko matud pa ang biktima ug gigukod niya ang suspek og sundang.

Ang suspetsado nga armado mipusil kausa sa biktima ug naigo kini sa likod hinungdan nga naangol.  Daling nisibat ang suspek samtang ang biktima gidala sa tambalanan.

Wala nadakpan ang suspek apan giingong gikombinsir na kini sa pamilya aron motahan. IBM BANAT NEWS