Nagutman nagdala og kutsilyo nga nangatang

CEBU, Philippines — Naalarma ang mga residente sa Sitio Lower Sto. Niño, Barangay Inayawan, Siyudad sa Sugbo dihang usa ka lalaki ang nangatang ug nagdala-dala og kutsilyo kagahapon sa kadlawon.

Niresponde ang mga tanod sa Barangay Inayawan apan nisukol ang maong lalaki nga nailhan nga si Jemar Papasin, 23-anyos, residente sa maong dapit.

Gikataho nga pagresponde sa mga tanod gilabay ni Papasin ang kutsilyo nga iyang gibitbit ug dihang nakakita kini nga nanawag og polis ang mga tanod nisaka kini sa atop sa balay sa ilang silingan.

Nakapabalaka sa mga tanod ang pagsaka ni Papasin sa atop ilabi na nga daghang wire sa gisak-an nining atop.

Sulod sa duha ka oras gisigihan og hangyo si Papasin sa mga tanod, polis ug mga kaila niini nga monaog na apan wala kini nipatuo.

Hinungdan nga giadto sa mga tanod ang ilahang hepe nga si Eddie Abapo.

Si Abapo na maoy nakig-estorya kang Papasin diin iyaha kining gi-alam-alaman ug gisultihan nga moadto sila sa Barangay kay mangaon.

Nasayran nga si Papasin nag-inusara kini sa pinuy-anan tungod kay ang iyang pamilya anaa na nagpuyo sa Lungsod sa San Fernando.

Gikataho usab nga mawala sa iyang kabuot si Papasin kon dili kini makakaon ug giingong tiggamitan kini og ilegal nga drugas.

Dihang na-rescue si Papasin  gidala kini sa barangay, gipakakaon ug gipapahuway. BDB BANAT NEWS