Tulo ka landmark sa Sugbo napiling National Cultural Treasures

CEBU, Philippines — Sa pagsaulog sa National Heritage Month opisyal na nga tawgon nga National Cultural Treasures ang Fort San Pedro, Plaza Independencia ug ang Miguel Lopez de Legazpi Monument.

Kini human nga pormal nga pag-turnover ug pag-abli sa mga marker gikan sa National Museum of the Philippines.

“This recognition granted by the National Museum of the Philippines honors the exceptional historical, cultural, and artistic value of these sites”, matud sa post sa National Museum of the Philippines-Cebu.

Napili ang tulo tungod kay naghatag kini og makasaysaynon nga kultura, handumanan ug garbo dinhi sa Dakbayan sa Sugbo.

 Gani, nihimo og assessment ang National Museum of the Philippines ug gipaubos usab kini og konsultasyon sa mga eksperto nga nag-ila sa talagsaong kasaysayan sa mga landmark ug adunahang lokal nga arte.

Ang Fort San Pedro nagsilbi kini nga estraktura sa depensa militar sa Sugbo nga gitukod sa mga Espanyol ubos sa pagmando ni Miguel López de Legazpi kinsa mao ang unang gobernador sa  Pilipinas ug usa na kini nga siglo nga nagbarog diha sa Plaza Independencia.

Samtang ang Plaza Independencia usa kini ka mahinungdanon nga pre-colonial nga archeology nga dapit nga pabilin nga gibisita sa mga turista ug ang monyumento ni Miguel Lopez de Legazpi nagrepresentar kini sa malungtarong estorya sa kabilin sa Sugbo.

Gipangulohan ang makasaysayanon nga serimoniyas nila ni Cebu City Mayor Raymond Alvin Garcia, Vice Mayor Donaldo "Dondon" Hontiveros, opisyales sa National Museum of the Philippines lakip na ang Board of Trustee nga si Philip Rodriguez ug ang NMP-Cebu Administrative Officer Mario Marababol.

Lakip sa nitambong sa kaliohokan sila si Cebu City Sangguniang Panglungsod Secretary Atty. Charisse Piramide, Cebu Cultural and Historical Affairs Commission Commissioners Dr. Clodoveo Nacorda, Dr. Erlinda Alburo ug Architect Melva Rodriguez-Java, mga representante sa Cebu City Tourism Office, Cebu Association of Tour Guides ug La Liga Reenactors.

Ang ilang deklarasyon isip National Cultural Treasures usa ka testamento sa hiniusang paningkamot sa pagpreserba ug pagsaulog sa atong kagahapon. BDB BANAT NEWS