Nadakpan tungod sa FB

CEBU, Philippines — Tungod sa pagbaligya og motor pinaagi sa Facebook, nadakpan sa kapulisan sa Regional Highway Patrol Unit(RHPU)-7 ang giingong notadong carnapper diha sa Cypress Street, San Rosario Heights, Bacolod City niadtong Domingo, Mayo 25, 2025.

Ang akusado mao si Rocky Pastorpede Vaflor, 23, nagpuyo sa Ramylu Village, Purok Punta, Barangay Tangub, dakbayan sa Bacolod.  Kinsa gikatahong nangarnap og motorsiklo sa Dakbayan sa Lapu-Lapu ug wala na mopatim-aw. Apan kay nailhan man kini, napasakaan gihapon kini og kaso ug nalutsan og warrant of arrest.

Si Judge Vincent Deo Albeos, Presiding Judge sa Regional Trial Court Branch 54, Lapu-Lapu City penetsahan Mayo 19, 2025 ug dunay piyansa nga girekomendar nga P300,000.

Si Police Colonel Wilbert Parilla, Regional Chief sa RHPU-7 miingon nga dihang nilusot ang warrant of arrest niadto sila sa Iloilo City basi sa address niini apan  dunay biktima nga nipahibawo nila nga naa kini sa Bacolod City kay nag-post sa Facebook nga maligya siya og motorsiklo.

Nagpakaaron-ingnon nga mopalit og motorsiklo ang mga polis ug nagkasabot nga magkita sila sa usa ka lugar sa Bacolod ug didto nadakpan.

Giingong daghan na og nabiktima ang suspetsado sa dakbayan sa Lapu-Lapu, Bacolod ug Iloilo City. Moabang siya og motor nga mahalon apan dili na iuli ug pekehon ang nga papeles ug ibaligya.

Duha ka tawo ang iyang gibiktima sa dakbayan sa Lapu-Lapu, tulo sa Bacolod City usa ani polis nga nadestino sa maong siyudad samtang lain usab sa dakbayan sa Ilo-Ilo nga pulos mipasaka og kaso batok kaniya.

Dili siya madudahan kay tinuod nga lisensya ang iyang ipakita sa tag-iya sa motor nga iyang abangan.  IBM BANAT NEWS