Nanguha og whitening lotion natingkagol sa prisohan
CEBU, Philippines — Nagtingkagol sa prisohan sa Inayawan Police Station sa Cebu City Police Office(CCPO) ang usa ka 28-anyos nga babaye human nanguha og whitening lotion ug t-shirt diha sa usa ka iladong tindahan nga wala nibayad sa cashier diha sa Barangay Bulacao, Dakbayan sa Sugbo niadtong Miyerkules sa gabii, Mayo 28, 2025.
Ang suspetsado mao si Pearl Jane Igot Magdadaro, walay trabaho, taga Private Riverside, Barangay Sambag 1, Siyudad sa Sugbo.
Samtang ang representante sa tindahan mao si Babylyn Suico Albopera, 47-anyos, head security officer sa tindahan, taga Barangay Inayawan niining siyudad.
Base sa taho sa kapolisan nga ang suspetsado nikuha og upat ka whitening lotion nga nagkantidad tanan ngadto sa P1, 088 ug duha ka t-shirts nga nibalor ngadto sa P618.
Ang suspetsado gikatahong nigawas sa tindahan ug wala niagi sa cashier aron mobayad sa gipangkuha niini nga items.
Nabantayan sa security guard ang gihimo ang suspetsado hinungdan nga gidakop kini ug gitugyan sa Inayawan Police Station.
Kasong pagpangawat ang ipasaka batok sa suspetsado. (BANAT NEWS)
- Latest
