Upat patay sa bangga sa motor

CEBU, Philippines — Upat ka tawo ang nakalas samtang usa ang naangol sa nahitabong tulo ka aksidente sa motorsiklo.

Sa Cebu City, parehong nakabsan sa kinabuhi ang mga drivers sa duha ka motorsiklong nagkasungag diha sa dalan S. Osmeña, sa Barangay Tejero, siyudad sa Sugbo kagahapon sa buntag, Biyernes, Hunyo 6, 2025.

Ang mga motorsiklo nga nalambigit sa disgrasya mao ang Kawasaki Fury nga gimaneho ni Alvin Gargar Dilao, 35, taga Talisay City ug Kawasaki Ninja nga gimaneho ni Bugsy Nadal Quelestino, 18, taga Barangay Dumlog, Talisay City.

Sa imbestigasyon sa Traffic Enforcement Unit sa Cebu City Police Office(CCPO) base sa CCTV footage nga nakuha nila nakita nga kusog ang dagan sa driver sa Kawasaki Ninja gikan sa North paingon sa South sa direksyon padulong sa Plaza Independencia.

Pagabot sa eskina diha sa 13th Avenue, dunay usa ka pribadong sakyanan gikan sa south ang ni-left turn ug nisunod sab ang Kawasaki Fury kaniya.

Apan tungod sa kakusog sa dagan sa Kawasaki Ninja gikan sa north wala na kini makamenor o mohunong ug milahos kini apan napunggit niya  ang Kawasaki Fury nga ni left turn usab dungan sa pribadong sakyanan.

Tungod sa kakusog sa pagbangga parehong nangalagpot ang mga drivers apil ang ilang mga motorsiklo nga pulos nagusbat.

Gitabang sila sa mga rescue personnel sa Cebu City Disaster Risk Reduction and Management Office (CCDRRMO) ug gidala sa managlahi nga tambalanan.

Si Dilao gidala sa Vicente Sotto Memorial Medical Center apan gibalhin sa Cebu Doctor's Hospital apan nakabsan gyud sa kinabuhi.

Samtang si Quilestino gidala sa Cebu City Medical Center ug nakabsan sab kini sa kinabuhi.

Sa laing aksidente sa motorsiklo, patay ang 29-anyos nga babaye samtang angol ang 33-anyos nga uyab niini human madisgrasya ang gisakyan nilang motorsiklo sa Transcentral Highway, Barangay Cansomoroy, Lungsod sa Balamban niadtong Huwebes sa gabii, Hunyo 5, 2025.

Ang nakalas mao si Michelle Cabuguas Azucenas, 29 anyos, taga Lungsod sa Alcoy samtang naangol si Felchris Cenas Lopez, 33, taga Barangay Hipodromo ug maoy driver sa motorsiklo nga Honda Click.

Sa imbestigasyon sa Balamban Municipal Police Station ang motorsiklo nagbiyahe padulhog gikan sa Cebu City paingon sa Balamban Proper.

Pag-abot matod pa sa naasoy nga dapit nikagar ang brake sa motorsiklo hinungdan nga nawagtangan og kontrol ang driver ug natagak sa kanal.

Ang manag-uyab nakaangkon og grabeng  kadaut sa kalawasan ug daling gidala sa Cebu Provincial Hospital-Balamban sa Barangay Cansomoroy apan nakabsan sa kinabuhi ang babaye.

Sa aksidente sab sa Compostela, nakalas ang usa ka 48 anyos nga lalaki human siya nadasmagan sa naghaguros nga motorsiklo diha sa National Highway sa Barangay Magay, Lungsod sa Compostela alas- 5 pasado ang takna sa Biyernes sa buntag Hunyo 6, 2025.

Ang kapolisan sa Compostela Police Station miila sa biktima nga mao si Alejandro Camporedondo Amoto, taga dalan 22 Fatima sa Saint Mary Subdivision sa Barangay Nangka sa siyudad sa Marikina.

Samtang ang nakadasmag nga motorsiklo gimaneho ni Thomas Machiavelli Lawas, 28, taga dalan PG Almendras, Barangay Poblacion, Siyudad sa Danao.

Sa imbestigasyon sa kapolisa kusog kaayo ang dagan sa motorsiklo paingon sa Danao ug wala na kini makalihay sa biktima nga nilabang karsada anang tungora.

Gumikan sa kakusog sa impact sa maong pagdasmag ang biktima nalagpot kini mga kapin sa usa ka metros ug nadakdak sa sementadong karsada nga maoy  hinungdan sa grabeng pagkaangol niini.

Gidala sa Danao Provincial Hospital ang biktima apan nakabsan gayod kini sa iyang gininhawa.

Gitanggong karon sa detention cell sa Danao Police Station ang drayber sa motorsiklo ug kasong reckless imprudence Resulting to Homicide ang giandam sa kapolisan batok niini. IBM BANAT NEWS