Menor, laing tulo sikop sa buy-bust
CEBU, Philippines — Na-rescue atol sa buy-bust operation sa Sawang Calero Police Station sa Cebu City Police Office ang usa ka 16-anyos nga bayong-bayong diha sa Abellana Street, Barangay Pasil, Dakbayan sa Sugbo kagahapon sa kadlawon.
Ang maong menor residente kini sa Sitio Mahayahay 2, Barangay Pasil niining siyudad.
Nasakmit sa kapolisan gikan sa maong menor ang 5.18 gramo nga shabu nga nikantidad ngadto sa P35,224.
Gikataho nga ang maong menor kanhi drug player na kini ug nadakpan na usab ang inahan niini tungod sa pagkalambigit sa ilegal nga drugas.
Sa laing bahin, tulo ka suspetsadong ilegalista ang nadakpan sa Inayawan Police Station sa CCPO atol sa ilang buy-bust operation sa managlahing lugar sa siyudad sa Sugbo niadtong Martes. Ang kapolisan unang nipahigayon og buy-bust operation diha sa Sitio Maxipino, Barangay Bulacao niining siyudad.
Nadakpan sa maong operasyon si Rene Manalo Llamedo alyas “Opaw”, 36-anyos, nagpuyo sa maong dapit.
Nasakmit sa kapolisan gikan sa suspetsado ang 10.28 gramo nga shabu nga nagkantidad og P69,904.
Samtang sa Sitio Campar, Barangay Poblacion Pardo niining siyudad nasikop si Carl Vincent Donasco Midel alyas “Bibo”, 20, molupyo sa Sitio Sto. Niño, Barangay Poblacion Pardo.
Nasakmitan usab kini og 10.20 gramo nga shabu nga nagkantidad og P69,360.
Ang ika-tulong operasyon gipahigayon diha sa Sitio Sto. Niño sa maong barangay diin nasikop si Jenefer Suniega Padigos alyas “Jeggy”, 32, molupyo sa maong lugar.
Nakuha gikan sa suspetsado ang 10.36 gramo nga shabu nga nibalor og P70,448. (BANAT NEWS)
- Latest
