Notadong manglungkabay nasikop sa kapolisan

CEBU, Philippines — Gibalhog sa holding facility sa Lapu-Lapu City Police Office (LCPO) ang usa ka notadong manglungkabay nga nadakpan sa kapolisan human sa gihimong follow-up operation.

Una niini si Lapu-Lapu City outgoing mayor ug congressman elect Junard “Ahong” Chan mimando nga dakpon sulod sa 24 oras ang maong notadong manglungkabay human sa post sa social media sa usa ka biktima.

Suma pa sa mayor nga kinahanglan nga masikop sa daling panahon ang sama niini nga kawatan aron dili daghan ang mabiktima.

Segun sa asoy sa biktima nga alas 12 sa udto niadtong Hunyo 10 gihimo sa maong lalaki ang paglungkab sa ilang panimalay pinaagi sa pagguba sa door knob sa main door sa ilang balay.

Nakuha sa maong kawatan ang mahalon nga cellphone ug school shoes ug dali kini nga nisibat.

Suma pa sa biktima nga nailhan ang suspek gumikan kay adunay CCTV ang ilang panimay hinungdan nga bisan pa og nagpurong kini nakita gihapon ang iyang nawong. — /MEL (BANAT NEWS)