3 mayor sa Eastern Visayas na-stranded sa Israel

CEBU, Philippines — Tulo ka mga mayor ug ingon man mga lokal nga opisyales gikan sa Eastern Visayas ang natanggong karon didto sa nasud sa Israel nunot sa nagpadayong pagpamomba sa nasud sa Iran didto.

Sa report sa Philippine News Agency, ang tulo ka mga mayor ug uban pang lokal nga opisyal gikan sa Eastern Visayas nagpabilin sa ilawom sa usa ka bomb-proof bunker sa Israel duol sa ilang hotel.

Ang maong mga opisyal naa sa Israel alang sa usa ka study-visit nga may kalabotan sa programa nga “Promoting Sustainability and Food Security in Urban Areas."

Lakip sa na-stranded nga mga opisyal mao sila si Barugo, Leyte Mayor Aaron Balais; Lawaan, Eastern Samar Mayor Athene Mendros; ug Hindang, Leyte Mayor Betty Cabal.

Sa usa ka Facebook post ni Cabal niadtong Hunyo 8, makita nga luwas silang naabot sa Israel uban sa mga bise mayor ug usa ka kongresista, nga wala niya hinganli.

Samtang, si Balais namahayag nga adunay 17 ka mga opisyal sa gobiyerno sa Pilipinas sa ilang delegasyon nga nangita’g kataguan gikan sa pagpamomba ug mga strike sa Iran.

Matud ni Balais sa mga tigbalita magtulo ka adlaw na silang nangita og paagi aron makagawas sa Israel apan tanang exits sirado.

Nagplano unta nilang mogawas pinaagi sa Jordan apan gubot usab kaayo didto.

Ang mayor sa Leyte wala mobutyag kun si kinsa pa ang ubang mga delegado gikan sa Pilipinas tungod sa pagpamomba nga nakabalda sa komunikasyon.

Apan gikompirmar ni Balais nga nikontak na sila sa Philippine Embassy, ug ang deputy ambassador mibisita kanila niadtong Domingo. Ang mga opisyal gikatakdang motapos sa ilang foreign trip karong Hunyo 20.

Ang embahada sa Pilipinas sa Israel mipahibalo nga usa ka Crisis Management Team ang naporma ug gipreposisyon aron sa paghatag og mga relief goods, pag-reactivate sa mga designated shelters, ug pag-andam alang sa pagpauli sa mga Pilipinong gustong mobalik sa Pilipinas.

Nigrabe ang sitwasyon sa sayong mga oras sa Hunyo 13, sa dihang giatake sa mga pwersa sa Israel ang Iran, gikataho nga naigo ang mga pasilidad sa nuclear ug missile ug napatay ang mga top military commanders ug scientists.

Agig balos, gipalupad usab sa Iran ang mga ballistic missiles nga niigo sa daghang mga lugar sa Israel.

Gawas sa maong mga opisyales, usa ka grupo sa mga relihiyoso gikan sa Sugbu ang na-stranded didto nasud sa Egypt.

Si kanhi The Freeman ug Banat News Hugyaw reporter nga karon Konsehal sa Lungsod sa Sta. Fe, Jaypee Lao kauban sa religious pilgrim nga gilangkuban og pari, mga opisyal sa lungsod sa Sta. Fe nagtinguha untang mosulod sa Israel subay sa rotang gitaak sa mga Israelita sa panahon ni Moises padung sa yutang gisaad.

Si Lao nga nakahinabi sa Banat News  pinaagi sa chat mibutyag nga usa sila sa ka grupo sa mga pilgrims gikan sa Sugbo nga gilangkuban og mga pari, prayer groups, ug pipila ka lokal nga opisyal.

Matod ni Lao, miabot sila sa Cairo niadtong Hunyo 11 kay plano nilang didto manukad sa ilang pilgrimage nga naglakip sa pagsubay sa kasaysayan sa Old Testament padulong sa New Testament.

Nasaka na sab nila ang Mount Sinai—ang lugar nga  diin gihatag sa Ginoo kang Moises ang Napulo ka Sugo o 10 Commandments.

Matud pa niya samtang didto sila sa ibabaw sa Mt. Sinai  makita  nila gikan didto ang pag-intercept sa air defense systems sa Israel sa mga missiles nga gipaulan sa Iran.

Tungod sa tension, gidid-an ang bisan unsang biyahe pasulod ug gawas sa Israel maong natanggong sila sa Egypt. Nagplano silang mobalik nalang sa Cairo aron didto nalang sab manukad pabalik sa Pilipinas.

Sa pagsuwat ning balita, wala pa silay klarong schedule kun kanus-a makauli sanglit nakig-negosasyon pa ang ilang travel company para sa ilang flight.

Ang orihinal unta nila nga gigikanan sa ilang flight pabalik sa Pilipinas mao ang Queenb Alia International Airport sa Amman, Jordan apan tungod sab sa kaduol niini sa Israel, gipasira na ang ilang mga airspace didto. — /IBM (BANAT NEWS)