Durugista sikop, dunay kasong estafa nisurender

CEBU, Philippines — Nasikop sa mga operatiba sa Inayawan Police Station sa Cebu City Police Office atol sa ilang buy-bust operation ang suspetsadong durugista diha sa Sitio Villa Mangga, Barangay Bulacao, Dakbayan sa Sugbo niadtong Martes sa gabii.

Ang suspetsado mao si alyas “Sendoy”, 28-anyos, residente sa nahisgutang lugar.

Nakompiska sa kapolisan gikan sa suspetsado ang 10 ka gramong shabu nga nikantidad ngadto sa P68,000.

Ang suspetsado gitanggong karon sa detention cell sa Inayawan Police Station ug gikatakda kining pasakaan og tukmang kaso sa nahimo niyang kalapasan.

Sa laing bahin, nisurender niadtong Miyerkules sa buntag ngadto sa kapolisan sa Inayawan Police Station ang usa ka babaye human kini naisyuhan og warrant of arrest sa korte gumikan sa kasong estafa.

Ang suspetsado mao si alyas “Leobia”, 44-anyos, residente sa Sitio Cabancalan I, Barangay Bulacao, Siyudad sa Sugbo.

Si Regional Trial Court (RTC) Judge Don Ace Mariano Viloria Alagar sa Branch 141 ngadto sa sa Antipolo City, Rizal ang niluwat og warrant of arrest batok sa suspetsado.

Giakatahong niadtong Abril 24, 2025 unta ang unang hearing sa kaso batok sa suspetsado apan wala kini nitambong sa maong hearing.

Ang korte nirekomendar og P48,000 nga piyansa alang sa temporaryong kagawasan sa suspetsado. Anthony Despi, CNU Intern/BDB BANAT NEWS