122 ka indibidwal nakadawat og Jubilee of Hope Award
CEBU, Philippines — Mikabat sa 122 ka indibidwal ug mga representante sa nagkalain-laing Lay Organizations, Movements, ug Associations (LOMAS) sa Archdiocese of Cebu ang nakadawat sa Jubilee of Hope award sa Cebu Metropolitan Cathedral gahapon, Hunyo 23.
Kini kabahin sa pagsaulog sa Jubilee month for the laite kalambigitan sa Jubilee Year of Hope sa buwan sa Hunyo.
Gipangulohan ni Arsobispo Jose Palma ang maong seremonya og ang pagpanghatag og plaque sa mga indibidwal og mga representante sa nagkalain-laing organisasyon.
Matud sa Arsobispo, gihatagan og gipasidungog ang mga nagkadaiyang organisasyon para sa pagpakita og bili sa ilang ministry.
Dugang ni Arsobispo Palma, mao kini ang higayon sa pagpasalamat agi sa pagpanarbaho sa mga layko para sa paghigugma sa Ginoo.
Lakip sa nahatagan og award mao ang Banat News correspondent nga si Rowena Capistrano human siya giila nga nakahatag og kontribusyon sa paglambo sa archdiocese ug sa kinatibuk-ang pagtuo sa komunidad.
Si Capistrano nagpasalamat sa maong award nga gihatag kaniya ug siya miingon nga kini magsilbi niya nga inspirasyon aron sa pagpadayon sa pagserbisyo sa katawhan.
“Salamat kaayo sa pasidungog ug magsilbi kining inspiration aron magpadayon sa pagpangalagad sa katawhan ma broadcast man o dili. suma pa ni Capistrano sa iyang facebook post. — Clifford Bacon (BANAT NEWS)
- Latest
