Garcia nanghakot na sa iyang mga butang sa kapitolyo

CEBU, Philippines — Gipanghakot na ang mga butang ni outgoing Governor Gwendolyn Garcia sa Governor's Office sa Kapitolyo.

Apil sa gihakot ni Garcia ang mga paintings, arts, furnitures o mwebles nga iyang personal nga gipanag-iya ug dili sa Probinsya sa Sugbo.

Giklaro kini daan ni Garcia una pa siya mapasanginlan nga nanguha og kahimanan o butang sa Kapitolyo.

Matud ni Garcia ang Provincial General Services Office (PGSO) mamahimong maka attest niini sanglit aduna man kini inventory sa mga propedad sa Probinsya.

Sumala usab sa PGSO nga cleared na ug reported na ang tanang buhatan sa Governor`s office, tourism, PIO ug uban pa.

Niadtong Biyernes maoy ulahing adlaw sa government office ni Garcia isip gobernador sa Probinsya sa Sugbo, sanglit sa Lunes mao naman ang pagsugod sa bag-ong gobernador nga si Pamela Baricuatro.

Sa gihimong Gabii sa Pasalamat sa Kapitolyo, ang kataposang higayon nga gipasalamatan ni Garcia ang tanang misuporta kaniya sulod sa unom ka tuig sukad siya nabalik sa Kapitolyo isip gobernador alang sa iyang ikaupat ug ikalima nga termino.

Samtang, plano sab ni Baricuatro nga ipadayon ang usa sa mga programa ni Garcia nga alang sa mga micro-small medium entrepreneurs.

Sa usa ka interview, ang governor-elect nagkanayon usa sa iyang gustong ipadayon ang Sugbo Kahanas program ni Garcia usa ka skills-development program diin ang mga beneficiaries ipaubos sa skills training.

Ang Kapitolyo nakig-alayon sa Technical Education Skills Development Authority Region VII (TESDA VII) aron maoy motrain sa mga beneficiaries sa nagkadaiyang skill training courses sama sa baking, dress making ug uban pa.

Si Baricuatro nagkanayon nga wala magpasabot nga kang Garcia kini namugna nga programa dili na niya ipadayon.

Kun ang maong programa makabenepisyo ang mga Sugboanon, angay ra pud kini ipadayon, ug ang Sugbo Kahanas maoy usa sa mga programa nga iyang nakita nga makatabang sa mga konstituwente sa lalawigan. (BANAT NEWS)