Kaluha napunggit, usa patay

CEBU, Philippines — Patay ang usa ka menor de edad samtang talandugon ang kahimtang sa kaluha niini human nabangga ang ilang gisakyang motorsiklo sa gikasugat nga awto diha sa Barangay Ginablan, Lungsod sa Badian niadtong Biyernes sa gabii, Hunyo 27, 2025.

Ang namatay mao ang 15-anyos nga si lalake nga si alyas Jansen ug naangol ang kaluha niini nga si alyas Gene, pulos taga Barangay Poblacion sa maong lungsod.

Ang namatay maoy matud pa nagmaneho sa motorsiklo. Ang duha daling gidala kini sa tambalanan sa Lungsod sa Balamban apan gideklarar nga dead-on-arrival si Jansen samtang ang iyang angkas nga grabe sab ang pagkaangol gibalhin og tambalanan sa Cebu City.  Sa pagkutlo ning maong balita gikustodiya sa ang driver sa Toyota Wigo nga si alyas Joey, 28, taga Barangay Masa, Lungsod sa Dumanjug. Duna kini kauban sa maong awto.

Base sa imbestigasyon sa Badian Police Station kusog matud pa ang dagan sa motorsiklo paingon sa Barangay Poblacion, Lungsod sa Badian.

Samtang ang Toyota Wigo gadagan southbound paingon sa Lungsod sa Alegria.

Apan pag-abot sa naasoy nga lugar ang motorsiklo giingong nilapas sa pikas lane ug nibangga sa kasugat nga Toyota Wigo.  Gumikan sa kakusog sa pagbangga nalabay sa karsada ang kaluha ug nangaangol.

Matud pa ang duha ka biktima wala magsul-ob og helmet dihang nahitabo ang disgrasya.

Sa laing bahin, sobra na sa lima ka motorista ang nangalamba tungod sa gubaon nga karsada sa eskina San Isidro sa Cebu South Coastal Road (CSCR) sa Barangay San Isidro, Dakbayan sa Talisay.

Kini maoy gikumpirmar ni Jonathan Tumulak, pangu sa City of Talisay-Traffic Operation Development Authority (CT-TODA).

Si Tumulak niingon nga sa nagdagan nga adlaw nagkaubos ang lebel sa dan nga semento. Matud pa niya nga kung single nga motor nga mag-change lane nga makaagi sa dapit siguro gyud nga malamba. Ang lugar nga malambahan sa motorista nag-viral na sa social media gumikan sa kadaghan na nga motorista nga nadisgrasya anang dapita.

Si Tumulak miingon nga ila na kining gihangyo ang Department of Public Works and Highways (DPWH) apan hangtud karon wala pa gihapon matagad.  - Anthony Despi, CNU Intern/IBM (BANAT NEWS)