Nagkahupas nga gugma

Dear Tito  Miguel,

Maayong adlaw , ako diay si  Franz, taga Barangay Mabolo ,Cebu City ug nagtrabaho isip  elementary teacher sa usa ka private school. Duna koy uyab nga ginganlan og    Ayana, taga Mandaue City ug nagtrabaho siya isip manager sa usa ka sikat nga restaurant.  Tulo ka tuig na ang among relasyon. Apan dili kaayo nako ma -feel ang kilig sa among relasyon kay puros gyud mi busy. Panagsa ra mi mag-date, kay lagi puros mi busy sa tagsa-tagsa namo nga career.Makaingon ko usahay nga uyab rami  kun magkita. Bag-ohay lang, akong gi-evaluate ang akong feelings kaniya. Tungod sa among sitwasyon, nagkahupas ang akong feelings ngadto kaniya. Nisulti gyud ko kang Ayana kalabot niini, ug niana siya nga susama daw mi og na-feel. Nagkahupas pud ang iyang feelings dinhi kanako.  So nakahukom ko nga  magbuwag nalang mi, apan   dili man siya mosugot uy. Sayang daw ang among tulo ka tuig nga  relasyon .  Unsay ikasulti nimo Tito Miguel, ako ba siyang uyonan nga ipadayon ang among relasyon? — Franz 

*  * *

Franz,

Kun nahupas na ang inyong gibati sa usa’g-usa, wala nay rason nga kamo magpadayon pa. Apan dili siya makigbuwag. Tingali namasin nga mobalik ang kainit sa inyong gibati. Lisod na, kalit ra man nahanaw inyong gugma sa usa’g-usa. Wala ninyo tuyoa. Buot pasabot dili pa lawom inyong gibati sa primero pa lang. O dili ba kaha dili siya ganahan mag-inusara. Kay busy man siya, ganahan lang siya nga dili mausab iyang kahimtang labi na sa relasyon ninyo duha. Tingali dili niya kaya maghunahuna kabahin sa relasyon samtang tutok siya sa iyang trabaho.

Kini tanan dili igong rason nga ipadayon inyong relasyon. Istoryaha’g balik, ingna wala na moy padulngan duha. Wala’y si bisan kinsa mabasol, kalit ra nihupas inyong gibati sa usa’g- usa. Kun dili gihapon mosugot, ingna dili nimo siya mapugos, apan para kanimo kamo duha tapos na.

Lagmit dili na mogukod. Wala man kaha’y oras. Labaw sa tanan iyang gibati kanimo nihupas na. Walay rason nga siya mogukod pa. Pero pananglit lang, tingali tungod sa garbo, dili makadawat nga siya imong gibiyaan, o diha pa siya nakaamgo nga nahigugma pa siya nimo. Kun pareho mo’g gibati, wala’y problema. Apan kun para nimo wala na’y paglaom, balibad lang sa hingpit sa pulong ug buhat. Ayaw na pakigkita, putla tanan ninyo nga  komunikasyon.  — Tito Miguel

Magpatambag ka? Ipada kang Tito Miguel: 0991-318-9366