Elias sa bash wala makaikyas

Sama kakusog sa kuwitis, kalit lamang misulbong ang ngalang Elias J. TV ug kaubang Kalumad Band sa industriya sa kalingawan, kinsa mga reggae nga kanta mao kanunay ilang tirada.

Graduwado sa kursong criminology si Elias Lintukan (tinuod niyang ngalan), nakaasawag guwapang maestra ug sila adunay bugtong anak lalaki. Anad og trabaho sa bukid si Elias sama sa tigpamunot og mga lubi ug pagpanguhag tagok sa rubber trees sukad niadtong bata pa ug bisan karon nga nahitalay na siya sa mga sikat nga celebrity niining atong panahon tungod sa talagsaong hiyas sa pagsayaw ug pagkantang iyang nahuptan.

Diin ang manan-away labi nag mga babaye, daw magneton sa iyang mga makalingawng aksiyon (maginoon, pero medyo bastos) itaas sa stage atubangan sa bagang duot sa nagpunsisok nga katawhan, kinsa pulos enjoy kaayo sa iyang mga pasiawng ‘pahiyodhiyod dance’ ug pinabaklabaklang linaktan.

Sikat na kaayo si Elias. Halos kada adlaw, anaa nay mokuha sa ilang banda. Subo lang palandungon, kay ang mayor sa Bilar, Bohol ug ang katawhang mipuno sa nagastohan nag dakong inandam nga venue alang sa Elias J. TV Kalumad Band, kinsa pulos misakripisyog dugay sa ilang pagpinaabot, giindiyan ni Elias ug sa iyang banda.

Haskang yawyawa sa taga Bohol. Haskang dalia nakapabaha og pagsaway ang mga bashers sa social media. Midako na kuno ang ulo ni Elias. Nagpapresyo!

Hinuon, masulob-ong mipasabot si Elias ngadto sa mayor ug sa tanan niyang naindiyan nga fans.

Naproblema kuno sila sa flight. Hinungdan, wala sila makasakay. Busa, sa kinasingkasing, nangayo siyag pasaylo.

Bag-ong manedyer ni Elias, Ms. Beverly Labadlabad, mipahayag sab. Diin, nakita hinuon sa mga basher, ang tinuoray'ng kinaiya sa manedyer. Dili kini friendly. Kondili, palaaway! Dili kini mapaubsanon, kondili, mapahitas-on! Siya pa ang nakasala, gusto pa gyod kini manghinaw diha sa pag-ingon: ‘Kapag hindi talaga para sa atin na ibinibigay ng Diyos, kahit anong gawin natin, hindi talaga mangyayari yon.”

Pastilan, sa iyang sipyat, ang Ginoo pay gipasanginlan. Pagbuot man kadto nimo, Beverly, nganong wala madayon ang naasoyng event. Kulang ka sa diskarte, kulang sa kaseryosa sa pagpangandam-pagtuman sa gikasabotang commitment!

Pero'g milihok ka pa subay sa kabubut-on sa Diyos? Aw, dayon unta ang concert!