Transition period importante g'yud

Niadtong na-promote ko gikan sa pagka-working scholar, Record Clerk sa University of San Carlos (USC), Registrar’s Office, ngadto sa pagka-fulltime Evaluator sa mga nanguhag kursong Bachelor of Science (BSC, major in Accounting), dili gyod nako malimtan kadtong usa ka malipayon-mahigalaon-malinawong transition period nga mao ang ang pag-turnover ug pag-takeover of command.

Gihikyad gyod sa outgoing evaluator sa tumang katin-aw ang tanang gimbuhaton: dos ug don’ts ug pros and cons nga iyang gibilin-gipasunod nako. Gitudloan ko niya sa mga bag-ong responsibilidad nga wala pa nako mahibaw-i ug nagbilin pa gyod siyag kompletong job’s description aron ako dili malimot. Unya, human sa mao niyang paggiya ug pag-turnover sa mga trabahoong gitunol nga ako gyong gitanom sa akong ulo’g kasingkasing, sa binukhad niyang mga palad, siya miingon: “Congratulations, Jav!”         

Lahi ra sa nahitabong Transition Period sa Kapitolyo, diin kulang sa kooperasiyon si outgoing Cebu Governor Gwen Garcia sa pagpakighinabi ngadto sa incoming newly elected Governor Pamela ‘Pam’ S. Baricuatro, kinsa imbes atubangon personal ni Gwen alang sa nahisgotang katuyoan, gilikaylikayan hinuon.

Girakrakan sa pagpayil og nagpungasing mga kaso, diin usa niini, ang petisyon-reklamo nga gitikasan kuno si Gwen sa pag-iniphanayg boto sa vote-counting machine. Hinungdan, sa iyang pagkapilde. Haskang paita kinaiya, sa?

Wala g'yuy suwabeng transition period nga nadawat si Pam. Buwahan, 100% unta siyang makapangandam sa unang adlaw sa iyang pagtrabaho, Hunyo 30, 2025, isip mao nay bag-ong gobernador sa Sugbo.

Kay unsaon, matod pa sa balita, isagad kuno ni Gwen ang iyang pag-estar sa Kapitolyo. Sa nahisgotang petsa pa gyod siya mopahawa.

Kaanugon sa atong pagdayeg-pagsaludo, mga Cebuanos, sa pagka-workaholic-kaisog-kahait ni Gwen sa iyang pagpangalad sa katawhan kanhi. Diin puwerte gyong pagkausaba dihang gibiyaan niya ang mga Duterte ug didto na siya mag-fulltime-dapig sa Marcos-Araneta-Romualdez Team of Thorns. Kaanugon sa iyang pagpamamutag mga imahe ni Sr. Santo Niño sa iyang opisina ug ang pagpalanog nga: “The voice of the people is the voice of God. Unya, wala niya sunda!

Makabalik pa kaha si Gwen sa Kapitolyo human iyahang gibaliwala lamang ang kaimportante sa Transistion Period? Or, mao na kini sinugdanan sa iyang pagkalawos? Sa bagay, choice niya kini. Ug segurado, iya na kining gipangandaman!