Knicks, Wolves misikit sa Conference Finals

CEBU, Philippines — Ang New York Knicks ug ang Minnesota Timberwolves parehong nanoktok karon sa pultahan sa NBA conference finals human gipakaging na sab sa ilang mga karibal kagahapong adlawa.

Si Jalen Brunson mipabuto og 39 puntos sa dihang ang Knicks dalaygong mibangon human malubong og 14 puntos sa second-half aron piogon ang Boston Celtics, 121-113,  nga nakahatag kanila og 3-1 nga labaw sa ilang best-of-seven NBA Eastern Conference semifinal series.

Si Brunson mibubo og 18 puntos sa ikatulong kuwarter diin ilang gilabhan ang Celtics, 37-23.     Tungod sa mainit nga mga kamot ni Brunson,  ang Knicks wala lamang mipapas sa 72-58 nilang alkansi apan miangkon sab sila og 88-85 nga labaw padung sa pinal nga 12 minutos. Nakasustinir sa ilang kainit ang Knicks  aron silyohan ang ilang daog uban ang 118-106  nga bentaha human sa dunk ni OG Anunoby sa nahibiling dos minutos.

Ang Knicks nanginahanglan og usa na lang daog aron moabante sa East Finals sa unang higayon sukad niadtong 2000.

Sa habig sa Celtics, natiwasan pa ang ilang kalbaryo gumikan kay ang alas nilang si Jayson Tatum nakahiagum og seryosong injury ug gipagawas sa korte luwan sa usa ka wheelchair sa katapusang kuwarter.

Didto sa San Francisco, si Anthony Edwards nagmangtas sa ikatulong kuwarter sa dihang gidagit sa Wolves ang Golden State Warriors, 117-110, aron paglayat ngadto sa usa na lang ka daog gikan sa West Finals.

Si Edwards miharos og 30 puntos ug ang iyang pagpanginit sa ikatulong kuwarter miresulta sa 17 ka sagunson nga puntos sa Wolves nga nakahatag kanila og 85-68 nga bentaha.

Ang Wolves miinat pa sa ilang labaw ngadto sa 20 puntos padung sa katapusang kuwarter. Wala na nila paginhawaa pa sukad niadto ang Warriors.