Thunder 2-0 na batok Wolves

CEBU, Philippines — Ang bag-ohay pang gikoronahan nga MVP nga si Shai Gilgeous-Alexander migiya sa Oklahoma City Thunder ngadto sa 118-103 nga paglatigo sa Minnesota Timberwolves aron pagposte og 2-0 nga bentaha sa ilang best-of-seven NBA Western Conference finals kagahapong adlawa didto sa Paycom Center sa OKC. Gipresenta ngadto ni Gilgeous-Alexander ang iyang MVP award sa korte sa wala pa ang duwa ug tataw nga nakapadasig kini kaniya og samot.

Inabagan sa mainit nga abiba sa bagang panon sa ilang fans, ang Canadian All-Star guard miharos og 38 puntos, walo ka assists ug tulo ka rebounds sa ikalima niyang sagunson nga duwa sa playoffs diin siya mi-iskor og kapin sa 30 puntos.

Si Jalen Williams mitimbre og 26 puntos ug 10 ka rebounds samtang si Chet Holmgren midugang og 22 puntos alang sa Thunder, kansang depensa dominante kaayo sa krusyal nga bahin sduwa. Sikit kaayo ang sangka sa first half apan ang Thunder nagmangtas sa ikatulong kuwarter diin sila naglabaw og 17 puntos, 82-65, sa usa ka higayon human sa dunk ni Chet Holmgren.

Igo lamang nakasikit ang Wolves ngadto sa 10 puntos.

Si Anthony Edwards mipupo og 32 puntos, unom ka assists ug siyam ka rebounds apan ang katumpang niyang si Julius Randle nalimitahan ngadto lamang sa sayes puntos nga usa sa mga hinungdan sa pagkasuparap na sab sa Wolves.