Chase Tower Runs milampos pagdepensa sa ilang korona

Back-to-back champions sa Dayo23 Streetball

CEBU, Philippines — Ang Chase Tower Runs (CTR) milampos pagdepensa sa ilang trono sa men's division sa Dayo23 treetball Invitational, nga gipahigayon didto sa nabantog nga basketball court ubos sa Mabini Bridge sa Barangay 830 sa kaulohan niadtong weekend.

Ang CTR nga gipanag-iya ni shipping magnate ug social media influencer Chase Cokaliong miposte og kulbahinam nga daog batok sa Blancas Golden Knights sa Davao City, 23-21, sa race-to-23 final aron pagsuwat og laing kasaysayan isip labing unang back-to-back champions sa liga nga gipresenta sa Jordan Brand ug Titan.

"Congratulations to the boys for playing hard, unselfish and 'bisaya' basketball. Chase Tower Runs is at our core, all about family. Now after two seasons, we are 12-0 in games and have two trophies to show for it. I’m very proud of the guys not only for winning but also on how they won," matud pa ni Cokaliong.

Sulagma kaayo nga ang mga pambato sa Sugbo midominar sa unang edisyon sa miaging tuig pinaagi sa susamang iskor batok sa Team HoopX sa Manila.

Si JD Cagulangan, ang kasamtangang Korean Basketball League (KBL) Rookie of the Year nga kaduha nakampiyon sa UAAP uban sa University of the Philippines (UP) Fighting Maroons, maoy nakapadaog sa Team CTR ning higayona.Gawas ni Cagulangan, ang ubang mga miyembro sa Team CTR ubos sa paggiya nilang coach Paul Joven ug coach Roger Justine Potot naglangkob nilang ex-PBA player Greg Slaughter, Nigerian big man Emmanuel Ojuola, Jancork Cabahug, Froilan Mangubat, Ted Saga, Miguel Gastador, Jerome Napao, Lawrence Mangubat, Isaiah Blanco, Jose Marie Tumabang ug Kobe Christian Palencia.