Batch 2004 padayong nanginit sa SHAABAA
CEBU, Philippines — Namintinar sa '04 The Win Batch 2004 ang perpekto nilang sinugdanan human gilampaso ang Knox Steel Batch 2007, 77-59, sa Sacred Heart Ateneo Alumni Basketball Athletic Association (SHAABAA) Season 28 didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.
Si Franco Augusto Te miposte na sab og double-double uban ang 18 puntos ug 17 ka rebounds nga iyang gisukipan og upat ka assists, duha ka steals ug duha ka blocks samtang si Ricardo Pepito midugang og 17 puntos alang sa Batch 2004, nga padayong nagsolo sa liderato sa Division B bitbit ang 3-0 rekord.
Mitimbre si Christopher Consunji og 11 puntos ug upat ka rebounds samtang si Kyle Valmoria miamot og 10 puntos, pito ka rebounds ug upat ka assists alang sa Batch 2004.
Sa laing bahin, ang ZLREJ Trading and Construction Batch 2010 mitunol sa Subtero Batch 2006 sa una niining pilde, 62-50.
Si Charles Divinagracia mipabuto og 20 puntos samtang si Jasper Diaz milangkat og 20 ka rebounds aron ipuno sa nakabkab niyang 17 puntos sa dihang ang Batch 2010 miinat sa ilang baraha ngadto sa 2-1 aron pagpuwersa og triple-tie uban sa ilang biktima ug Insular Square Batch 2005, nga mirehistro sa ikaduha nilang daog human gikastigo ang Harley Davidson Batch 2012, 75-55. Si Jet Wahing mihipos og 16 puntos, pito ka rebounds ug upat ka assists alang sa Batch 2005 samtang si Alexter Dan Tecson midonar og 14 puntos.
Sa ubang resulta, ang mga koponan sa Batch 2000 nga 2K Core Pacific Group ug 2kcares.org impresibong namawi human mapakyas sa buena mano nilang duwa. Si Sergs Al Go Bui mipabuhagay og 38 puntos samtang si Joel Co mikadlit og 18 puntos ug 10 ka rebounds aron ituboy ang Core Pacific Group ngadto to a 88-46 nga demolisyon sa Golden Dragons Batch 2012.
Wala sab magpabitin si Hanzel Uy nga miharos og 23 puntos, siyam ka rebounds, duha ka assists ug duha ka steals ingon man si Albert Chua nga mikimada og 14 puntos ug duha ka rebounds sa dihang gipakaging sa 2kcares.org ang Magis Medical Fund, 71-62.
- Latest
