Haliburton Bayani sa Pacers Indiana mipakurat sa Thunder pagsugod sa NBA Finals

CEBU, Philippines — Si Tyrese Haliburton milansang sa game-winning basket sa 0.3 segundo nga nahibilin sa dihang gipakuratan sa Indiana Pacers ang inilog nga Oklahoma City Thunder, 111-110, sa pasiuang duwa sa ilang best-of-seven NBA Finals kagahapong adlawa didto sa Paycom Center sa OKC.

Ang 25-anyos nga si Haliburton mihatag sa Pacers sa bugtong nilang labaw sa duwa human nasud ang iyang jump shot gikan sa 21 ka tiil nga nakapakugang sa Thunder. 

Dalaygon kaayo ang gibuhat sa Pacers, nga madasigong mibangon human mabiyai og 15 puntos sa pinal nga 9:42 sa kulbahinam nga aksiyon.

"I'm confident in my ability and feel like if I can get to my spot I'm really comfortable from there. I really had confidence in my shot," matud pa ni Haliburton, nga mitapos uban ang 14 puntos ug 10 ka rebounds.

Si Pascal Siakam mikadlit og 19 puntos, si Obi Toppin mi-iskor og 17, samtang sila si Myles Turner ug Andrew Nembhard nagkumboya'g 29 puntos alang sa Pacers, nga mitak-op sa duwa pinaagi sa mainit nga 14-2 rally aron pahilomon ang Thunder.

Ang Thunder abante pa og singko puntos, 110-105, human sa layup ni Shai Gilgeous-Alexander sa katapusang dos minutos apan sila si Nembhard ug Siakam nagtambayayong aron pagpasikit sa Pacers ngadto sa usa na lang ka luga, 110-109.

Sa sunod nga posisyon, nakuha ni Nesmith ang rebound gikan sa sipyat ni Gilgeous-Alexander nga maoy nahimong hagdanan ni Haliburton pagtagak sa game-winning shot.

Nagpahinumdum kini sa unang duwa sa Eastern Conference finals diin ang buzzer-beater ni Haliburton maoy naka-overtime sa dihang gipayaka sa Pacers ang New York Knicks human sila malubong og 20 puntos.

Si Gilgeous-Alexander mipaulbo og 38 puntos apan wala mosaler ang nindot niyang salida sa Thunder ning higayon.

Masaligon hinoon ang Canadian MVP nga makabawi sila human nauwawan atubangan sa bagang panon sa ilang mga fans.

"Me personally, how you lose doesn't really matter," matud pa ni SGA. "Obviously it sucks, last-second shot, the energy in the arena and stuff like that. But we lost at the end of the day. We lost game one. We've lost game one before. The series isn't first to one, it's first to four."