SHAABAA Season 28: Batch 2004 miangkon og awtomatik nga luna sa semis

CEBU, Philippines — Ang '04 The Win Batch 2004 mibuntog sa  2K Core Pacific, 85-75, aron pagpabiling way pilde sa Sacred Heart Ateneo Alumni Basketball Athletic Association (SHAABAA) Season 28 didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue. Bitbit ang perpektong 8-0 rekord, ang Batch 2004 miangkon og awtomatik nga luna sa semifinals bisan og unsa pay resulta sa katapusan nilang duha ka duwa sa eliminasyon.

Si Kyle Valmoria maoy nangu sa Batch 2004 uban ang 21 puntos, lima ka rebounds, pito ka assists ug tulo ka steals. Si Gino Paolo Lopez midugang og 18 puntos, si Ervin Lopena mipupo og 16 puntos, 11 ka rebounds, lima ka assists ug duha ka steals samtang si Francis Dave Soria mitampo og 12 puntos, lima ka rebounds ug duha ka steals.   

Sa laing bahin, si Elddie Cabahug mitagak og 29 puntos, lima ka rebounds, duha ka assists ug duha ka steals samtang si Daryle Tan miharos og 24 puntos ug 18 ka rebounds sa dihang gipiog sa Insular Square Batch 2005 ang Onses Batch 2011, 73-68, aron pagpabilin sa ikaduhang dapit uban ang 7-1 nga baraha.

Si Gabe Branzuela mikolekta og 21 puntos, 11 ka assists, unom ka rebounds ug unom ka steals, samtang si Jaspez Diaz mihipos og 19 puntos, 12 ka rebounds, duha ka steals ug duha ka blocks aron pangulohan ang ZLREJ Trading Batch 2010 ngadto sa 89-39 nga demolisyon sa 2kcares.org. Miamot si Charles Divinagracia og 18 puntos, pito ka rebounds ug upat ka assists samtang si Joshua Belarmino midonar og 13 puntos, 15 ka rebounds ug tulo ka steals alang sa Batch 2010, nga anaa gihapon sa ikatulong puwesto uban ang 6-2 nga marka.

Sa laing mga resulta sa Division B, si Mikey Cabahug mipatuasik og 29 puntos, pito ka rebounds, upat ka assists ug upat ka steals sa dihang ang Subtero Batch 2006 mitabla sa ilang rekord ngadto sa 4-4 human gipakaging ang Knoxsteel, 68-60, samtang si Reynald Lim mikadlit og 21 puntos ug 10 ka rebounds sa dihang gipaluhod sa Golden Dragons Batch 2012 ang Magis Medical Fund, 64-54, alang sa ikatulo nilang daog sa walo ka duwa.

Sa Division C, ang Xchange Forex Batch 2018 ug ang Imperial House of Furniture Batch 2015 padayong nagsawo sa liderato bitbit ang managsamang 5-0 nga baraha.

Si Benedict Andre Chua hapit morehistro og triple-double uban ang 24 puntos, 13 ka rebounds ug walo ka assists, si Xavier Tarriman mi-iskor og 19 samtang si Juliano Yusingco mitimbre og 14 puntos ug 11 ka rebounds aron ituboy ang Batch 2015 ngadto sa 109-70 nga paglampaso sa Kaway Batch 2023.

Si Anton Bennett Chua mikuha sab og atensiyon human miharos og 20 puntos, lima ka rebounds, upat ka assists ug duha ka steals sa dihang ang Batch 2015 mipukan sa BYD Batch 2020, 64-59. Si Irvin Dwight Dumol miamot og 14 puntos, upat ka rebounds ug usa ka assist alang sa Batch 2015.

Sa ubang mga sangka, ang Sugbuanong "King Tiger" sa UST nga si Nic Cabañero mipabuto og 42 puntos uban ang 14 ka rebounds ug tulo ka steals sa dihang ang FADI Batch 2021 miinat sa ilang baraha ngadto sa 3-2 human gipayaka ang Nest Workspaces Batch 2013, 87-83, samtang si Wilhelm Josh Go mipabuhagay og 28 puntos ug 21 ka rebounds sa dihang gipaksit sa Kilat'i Refreshments Batch 2024 ang Rufrance LPG Batch 2025, 109-98, alang sa ikaduha pa lamang nila nga daog sa lima ka duwa.