Ateneo, La Salle, San Beda kinalampag Senado sa VP Sara impeachment trial

MANILA, Philippines — Nakiisa na rin ang Ateneo School of Government (ASoG) sa ­akademya na kumakalampag sa Senado sa panawagang ituloy na ang impeachment trial ni Vice President Sara Duterte.

“We call on the ­Se­nate to fulfill its Constitutional duty and to proceed with the impeachment trial of Vice President Sara Duterte,” ayon sa pahayag ng ASoG.

Iginiit ng ASoG na pagpapabaya sa tungkulin kung hindi dadaan sa paglilitis at pagwawalang-bahala na malinaw na pagtatangkang i-whitewash ang mga alegasyon laban sa isang public official.

“The impeachment process is a sacred duty enshrined in our Constitution. It is the primary mechanism to ensure that our elected officials would remain faithful to their sworn duty to serve the public with dedication, commitment, and, most importantly, integrity,” ayon pa sa ASoG.

Nitong Biyernes, nanawagan din ang De La Salle University faculty members na nagsabing ang pagkakaantala ay nakakasira ng tiwala ng publiko at mawawalan ng tiwala ang publiko at balewalain ang Saligang Batas.

Gayundin ang nilalaman ng panawagan ng mga professor ng San Beda University (SBU) kabilang ang dalawang retired Supreme Court Justices.

Batay sa Facebook post ni Graduate School of Law, Dean, Rev. Fr. ­Ranhilio Callangan Aquino nitong Biyernes: “We, professors of the Graduate School of Law of San Beda university, in our individual capacities, respectfully urge the Senate of the Philippines to proceed with the trial of the Vice-President in accordance with Article XI of the Constitution.”

Kabilang sa 13 professors ng SBU sina dating SC Justices Adolf Azcuna at Jose Vitug ang ­humiling na ituloy na pagdinig sa impeachment.

Giit nila, dapat manguna ang malalaking sangay ng pamahalaan sa mahigpit na pagsunod sa mga utos ng Saligang Batas.

Malinaw din anila, na kapag na-verify na ang reklamo at inendorso ng hindi bababa sa one-third ng miyembro ng House of the Representatives, ang paglilitis ng Senate ay dapat kaagad (forthwith) magpatuloy. Wala ring legal at constitutional basis para maantala na katunayan, ang “undue delay” ay nagpapadala ng hudyat na pinipigilan para sa “ulterior ends”.

Ang pananagutan ay mahalaga sa mga gawain ng isang pamahalaan na dapat ay makakakuha ng paggalang at pagtitiwala ng mga mamamayan.

Una nang nanawagan ang 100 faculty members ng University of the Philippines College of Law at Dela Salle University-Department of Political Science and Development Studies na agad nang simulan ang impeachment trial.

Gayundin ang naging panawagan ng Philippine Political Science Association (PPSA) Board of Trustees na nagsabing ‘long-overdue’ na ang obligasyon at kawalan ng aksyon ay nagdudulot ng seryosong alalahanin sa transparency at institutional integrity.

Una nang itinakda ang pagsisimula ng impeachment trial noong Hunyo 2 subalit nailipat ang petsa ng Hunyo 11.