Mga katungod ni Gwen

Nakaseguro ko nga sa kadaghan sa iyang mga abogado ug mga abogada, napahibawo na si suspended Gov. Gwen Garcia sa tanan niyang legal nga mga katungod sa pagkuwestiyon sa sugo sa Ombudsman nga ipahimutang siya og unom ka buwan nga preventive suspension nga walay suweldo.

Hinaot nga wala nila makalimti pagtambag niya, bahala na kon makasab-an ug matulisokan sila, kay ilang obligasyon isip mga haligi sa sistema sa hustisya ang pagpasabot niya sa batakang mga balaod: Nga wala maapil sa iyang katungod ang pag-isnab sa sugo ni Ombudsman Samuel Martires.

Nakaseguro ko nga ila nang nasultihan si Garcia nga mahimo siyang mopasaka og motion for reconsideration sa Ombudsman sa paglalis sa legal o factual nga sukaranan sa pagsuspenso niya o pagpasalig nga dili siya moguba sa mga ebidensiya ni manghulga sa mga testigo aron pagsabotahe sa imbestigasyon.

Nanghinaot ko nga ila ang gipakapinan og tugotan si Garcia, bahala na kon sulirapan sa iyang hait kaayong mga mata, nga ang motion for reconsideration dili makapugong sa pagkatangtang niya sa puwesto ug pagkaputol sa gahom pagpirma og opisyal nga mga dokumento.

Nakaseguro ko nga ilang na-detalye ni Garcia ang iyang katungod pagpasaka og petisyon sa certiorari atubangan sa Court of Appeals (CA) nga mopasangil nga gi-abusohan sa Ombudsman ang iyang gahom nga niresulta sa pagkawagtang o paglapas sa hurisdiksiyon sa kasong gipasaka batok niya.

Nanghinaot kong nangisog sila pag-istorya ni Garcia, bahala na kon malabayan og bolpen o bisan unsang mapunitan, nga ang petisyon dili makapugong sa suspenso, gawas lang kon makapagawas dayong CA og temporary restraining order.

Nakaseguro sab ko nga ilang gitambagan si Garcia nga kon simbako ibasura sa CA ang petisyon sa certiorari makadangop siya sa Korte Suprema pinaagi sa pagpasaka og petition for review on certiorari, pinasikad sa pasangil nga nasayop ang CA sa pagsabot sa mga prinsipyo sa balaod.

Nanghinaot ko nga nangahas sila sa pagkumbinser ni Garcia nga ang tanang legal remedies nga ilang magamit batok sa sugo sa Ombudsman dili makapugong sa iyang pagka-suspenso. Hinaot nga dili sila maoy nagrekomendar, ug nisuway sila pagbadlong, sa paugat, pabaga, ug papating pagpilit sa Kapitolyo ginamit ang iyang koneksiyon sa Malacañang.