Hustisya sa mga biktima ni Gwen
Tan-awa ra gud unsa kamaayo sa Ginoo ga mopahimutang sa tanan. Dihang gi-inutil ni outgoing Governor Gwen Garcia ang provincial hospitals pagbalik niya sa Kapitolyo niadtong 2019, walay bisan usa nga nakapugong niya. Wala kasukol ang mga doktor ug nurses nga iyang gitaktak. Walay nahimo ang kabos nga mga pasyente nga napasagdan.
Pero human sa unom ka tuig, nakabawos ang iyang mga biktima. Katam-is sa hustisya nga ilang nakuha. Wala lang suspensoha si Garcia og pila ka buwan. Gitaktak gyod sa puwesto ug dako ang kahigayonan nga dili nang kabalik.
-o0o-
Palihug subaya unsa katalagsaon ang mga sirkumstansiya sa pagpaila ni Garcia sa dakong krimen nga iyang nahimo batok sa mga Sugbuanon–gipalabi niyang pag-usik-usik og minilyon ka pesos sa paukyab sa Suroy-Suroy ug Pasigarbo pero gihikawan sa gapas ug tambal ang mga ospital.
Usa sa iyang sinaligan sa gipasangil nga mga maniobra sa Kapitolyo naunay sa pag-abuso sa gahom. Namatay ang iyang paryente tungod sa kakuwang sa mga doktor ug kahimanan sa ospital sa ilang lungsod. Usa ni sa mga rason nganong nibuwag siyang Garcia ug nangampanya para sa kaatbang.
-o0o-
Nikumpisal si outgoing Provincial Board Member Jiembo Borgonia sa ikatulong distrito nga nahibulong siya nganong namatay ang iyang ig-agaw nga nadala man unta nila sa Provincial Hospital sa Balamban.
Nauwaw dihang gipasabot sa nurses nga mabuhi untang iyang ig-agaw kon naatol pa sa administrasyon ni kanhi Gobernador Junjun Davide nga nipalambo sa mga ospital. Pero ubos ni Garcia, ug niya isip representante sa distrito, ang ospital dili nang kaatiman bisan sa ordinaryong mga kaso.
-o0o-
Dili na mabuhi ang mga pasyente nga gipasagdan ni Garcia sa niaging unom ka tuig. Ambot unsay tinuod nga rason sa iyang pagluba sa mga ospital: Aron ba pagpaminawos nilang Davide ug kanhi Bise Gobernador Agnes Magpale nga giisip nga hulga sa iyang liderato niadtong 2019 o dili ganahang maibanan ang minilyon ka pesos nga gibubo pagsegurong sadya ang iyang Suroy-Suroy ug Pasigarbo?
Pero ang iyang kapildehan moseguro, labi na kon dili sabotaheon sa iyang board members ang administrasyon ni Governor-elect Pam Baricuatro, nga mapalambo nang mga ospital ug makaatiman sa labing kabos ug masakiton nga mga Sugboanon.
- Latest
