Hitman nahimong tunok
Human sa iyang pagtuman sa tanang sugo ni outgoing Governor Gwen Garcia sa niaging unom ka tuig, nakabantay si outgoing Provincial Board Member Jiembo Borgonia nga gi-apiki siya:
Giputol ang pundo sa mga proyekto nga siyay gitahasan pagpatuman sa unom ka lungsod ug usa ka syudad sa ikatulong distrito;
Wala siya paapila sa kampanya sa One Cebu, partido ni Garcia, nga maoy gipasilongan sa iyang pagpapili para sa ikatulo ug kataposang termino; ug
Gitangtang ang iyang ngalan ug nawong sa mga tarps sa One Cebu sa tibuok distrito.
-o0o-
Wala kaseguro si Borgonia unsay tinuod nga rason nga kalit siyang gi-junk ni Garcia:
Tungod ba sa iyang pag-awhag og public hearing, nga sukwahi sa baruganan ni Garcia, sa ilang gituki nga ordinansahon parte sa dugang bayranan sa Malapascua?
Tungod ba sa kabalaka sa mga Binghay nga modagan si Borgonia pagka-mayor sa Balamban human makahingpit sa iyang termino sa 2028?
Tinuod bang nihangyo si Kongresista Sonny Lagon ni Garcia nga pugson si Borgonia sa pagsibog sa iyang kandidatura aron pagseguro sa kadaogan sa anak ni Lagon nga si Lorenz?
-o0o-
Kumbinsidong dili kalahutay kon walay suporta sa One Cebu, ug nabalakang masakripisyo ang mga molupyo sa distrito sa kasuko ni Garcia, gibakwi ni Borgonia ang iyang kandidatura niadtong Abril ug nitabang sa kampanya ni Pam Baricuatro batok ni Garcia ug ni Amos Cabahug batok ni Mayor Ace Binghay sa Balamban.
Nidaog unta si Borgonia uban nilang Baricuatro ug Cabahug pero dili na siyang kalingkod. Andam hinuon siyang motabang nila sa bisan unsang kapasidad.
-o0o-
Labihan kakusganon ang paglaban ni Borgonia kang Garcia nga gitawag nga “hitman” sa gobernadora sa ubang board members. Pananglitan, siyay nangulo sa paglalis sa COVID-19 protocols nga gipatuman sa Inter-Agency Task Force atol sa pandemya.
Nikumpisal si Borgonia sa sa programang “Baruganan” sa YouTube gahapon nga dili ikapasigarbo ang iyang pagpagamit ni Garcia. Samtang dili andam nga mobisto sa mga sekreto sa Kapitolyo, maka-giya siya sa bag-ong administrasyon sa mga dokumento sa kontrobersiyal nga mga lakang ni Garcia --apil nang pagpahunong sa Apo Land and Quarry Corp. sa Naga ug pagpangayo og bahin sa reclamation project sa Tsuneishi ug mga Aboitiz sa Balamban.
- Latest
