Silang Gwen ug Raymond

Kaingon sa mga Sugbuanon nga lahi ang pag-umangkon sa iyaan: Nipasalig si outgoing Cebu City Mayor Raymond Garcia ni incoming Mayor Nestor Archival og hapsay nga transition; samtang giisnab ni outgoing Governor Gwen Garcia ang tanang pagsuway ni incoming Governor Pam Baricuatro nga magkatagbo sila.

Pero dayong Hunyo 30, naklaro nga wala diay kalainan ang pag-umangkon ug ang iyaan: Sama sa pag-isnab ni Gwen Garcia ni Baricuatro, wala sab diay mohatag si Raymond Garcia ni Archival og dokumento kon pilay nagasto ug pila pay nahibilin sa budget para karong tuiga.

Managlahi hinuon ang panglantaw sa pag-umangkon ug iyaan sa resulta sa eleksiyon: Si Raymond Garcia niangkon sa kapildehan ug nipahalipay dayon sa kadaogan ni Archival; pero si Gwen Garcia nipasaka og election protest batok ni Baricuatro ug niinsistir nga siyay tinuod nga gipili sa mga Sugbuanon.

Si Raymond Garcia, kansang mga dumadapig nangangkon nga naduhig silang Gwen Garcia, mas paspas nga nidawat sa resulta sa eleksiyon bisan gamay rang iyang biya ni Archival (79,230 ka boto) kay sa biya ni Gwen Garcia kang Baricuatro (342,873 ka boto).

Pero ang pag-umangkon ug iyaan pulos nibangil sa sunod nga mga administrasyon:

Si Raymond Garcia nitugyan sa ?700 milyones nga kontrata pagtiwas sa Cebu City Medical Center ngadto sa Dakay Construction bisan sa pagduda ni Archival nganong wala mahuman ang CCMC human sa 10 ka tuig ug kapin ?2 bilyones nga gasto; ug

Si Gwen Garcia nigapos og kapin sa ?2 bilyones sa trust funds pagpadayon sa Suroy-Suroy Sugbo ug ubang mga programa nga kanselahon ni Baricuatro.

Managsama sang pag-umangkon ug iyaan nga nagplano sa paghimong mas lisod sa pagpatuman nilang Archival ug Baricuatro sa ilang mga programa:

Si Raymond Garcia niaangkon nga nangulitawo na sa mga konsehal nga alyado ni kanhi Mayor Mike Rama aron pagkuha sa mayoriya sa Cebu City Council batok sa mga konsehal sa Bando Osmeña Pundok Kauswagan (BOPK) nilang Archival ug incoming Vice Mayor Tommy Osmeña; ug

Si Gwen Garcia masaligon nga padayong motuman sa tanan niyang mga sugo silang incoming Vice Governor Glenn Soco ug ang mayoriya sa mga sakop sa Cebu Provincial Board.