338 ka PWDs sa Cebu City wala makakuha og ayuda

CEBU, Philippines — Niabot ngadto sa 338 ka Persons with Disability (PWD) sa Dakbayan sa Sugbo ang wala makakuha sa ilang pinansiyal nga ayuda.

Gikataho nga niadtong Hunyo 17 ngadto sa 19, 2025 ang schedule sa pagpanghatag sa City Treasurer’s Office og ayuda sa mga PWD. 

Si Vivian Labra, local revenue collection officer, nipahibalo nga sa P45 milyones nga pundo nga gitagana alang sa 15,000 ka beneficiaries, 14,662 ka PWD lang ang nakadawat sa ayuda samtang 338 kanila ang wala makakuha sa ilang ayuda.

 Gibutyag ni Labra nga kadaghanan sa wala nakakuha gikan sa Barangay Guadalupe diin ang maong barangay ang adunay pinakadakong alokasyon sa pundo.

Matud ni Labra nga ang wala makuha nga ayuda “good as forfeited” na kini tungod kay nahuman na ang gihatag nga schedule ug wala kini nakuha sulod sa takdang petsa. Base sa guidelines sa CTO dili gitugot ang paggamit og authorization letter sa pagkuha sa ayuda ug gumikan niini kinahanglan nga personal nga motambong ang beneficiary aron makadawat sa ilang ayuda ug dili usab pwede ang representante nga mopuli.

Gikataho nga sa Barangay Guadalupe aduna kini P2.595 milyones nga alokasyon ug P174,000 ang wala magamit ug naibalik ngadto sa siyudad.

Ang Barangay Paril nga maoy pinakagamay og gahin nga pundo nga P60,000 wala naka-record og turn over.

Nikabat ngadto sa P1.015 milyon ang nabalik nga pundo ngadto sa PWD Office nga wala makuha sa beneficiaries.

Gikataho usab nga ang beneficiary nga dili makakuha og ayuda sa duha ka sunod-sunod nga distribution matangtang kini sa listahan ug magkinahanglan og reapplication sa Department of Social Welfare and Services (DSWS) kong gusto pa makadawat og tabang sa umaabot. —Shiela Mae H. Agrabio, CNU Intern, BDB BANAT NEWS