‘Bloodbath’ ni VP Sara may pagka-bayolente - Palasyo

MANILA, Philippines — Inakusahan ng Malakanyang si Vice President Sara Duterte na may pagka-bayolente.

Ito ang tugon ni Palace Press Officer Undersecretary Atty. Claire Castro nang tanungin sa kanilang reaksyon tungkol sa pahayag ni VP Sara na gusto niya ng “bloodbath” o pagdanak ng dugo sa kanyang impeachment trial.

Umaasa naman si Castro na figure of speech lamang ang pahayag ng Bise Presidente.

‘’Medyo may pagka-bayolente ang tugon ng ating Bise Presidente. We hope it’s just a figure of and it should not be taken literally,” pahayag pa ni Castro.

Kung iyan naman aniya ang nais ng Bise Presidente ay hayaan na lamang itong gumulong dahil magkakaroon naman talaga ng balitaktakan sa impeachment trial.

Iginiit pa ni Castro na hindi makikialam ang Pangulo tungkol sa naturang isyu.

Inaasahan naman na magsisimula na sa Hulyo 30 ang impeachment trial ni Duterte.

Nag-ugat ang reklamo sa Bise Presidente ng Kamara dahil sa hindi maipaliwanag na paggamit ng confidential funds at iba pang isyu.