‘Mensahe ng Bansa: Less Politics, More Service’ – survey

MANILA, Philippines — Sa isang pambansang survey na isinagawa ng HKPH Public Opinion and Research Center kasama ang Asia Research Center na nakabase sa Hong Kong, nakakuha ng 45% approval rating ang House of Representatives, habang 43% ang hindi nasisiyahan at 12% ang undecided.

Mas mababa ang nakuha ni Speaker Martin Romualdez na may 39% approval at 46% ­dissatisfaction.

Ayon kay Steven Su, program director ng ­survey, tumitindi ang pagkadismaya ng publiko sa Kongreso—lalo na matapos ang mga pagkakamaling pampulitika noong midterm elections.

“Ang impeachment case na isinampa sa panahon ng eleksyon ay nag-boomerang,” ani Su. “Imbes na pananagutan, nakita ito ng publiko bilang pampulitikang hakbang na makasarili at hindi napapanahon, na lalo lamang nakasira sa imahe ng Kamara.” Naging pabigat din ito sa mga kandidatong kaalyado ni Speaker Romualdez, lalo na sa mga pumirma sa reklamo.

Habang bumagsak ang reputasyon ng ­Kongreso, nanatiling matatag ang executive branch, dahil sa 90% suporta ng publiko sa panukala ni Pangulong Ferdinand Marcos Jr. na gawing P20 kada kilo ang presyo ng bigas.

Ayon sa pag-aaral, pinuri ang hakbang ng Pangulo, ngunit ang Kongreso ay nakitang kulang sa suporta sa ganitong mga makamahirap na programa.

Binigyang-diin ni Su na ang pahayag ng Pangulo na “wake-up call” ang midterm elections ay repleksyon ng pagkadismaya ng mamamayan sa sobrang pamumulitika.

Babala niya, kung hindi magbabago ang direksyon ng Kongreso tungo sa tunay na serbisyo, patuloy itong mawawalan ng tiwala mula sa publiko.

Ang survey ay isinagawa ng face-to-face interviews sa 3,500 respondents, may ±2% margin of error at 95% confidence level.