Kailangan pang may mamatay bago higpitan ang road safety
MASYADONG maluwag ang batas sa road safety. Halimbawa, maaring tumanggi sa drug test ang reckless driver kapag nadakip ng awtoridad.
Ganyan nga ang ginawa ng bus driver na nambangga ng limang sasakyang nakahinto sa expressway tollgate nu’ng May 1.
Sampu ang napatay niya, kabilang ang limang bata. At 37 ang nasugatan. Katwiran niya ay nakatulog siya sa manibela. Pinatotohanan ito ng mga pasahero ng bus, na nakapansing aantok-antok nga siya sa pagmamaneho.
Agad siyang isinailalim sa alcohol test. Hininga lang naman ang kailangan. Pero tumanggi siya sa drug test nu’ng una. Ihi ang kailangan dito. Ku’ng hindi pa umangal ang madla, hindi siya oobligahin ng may-ari ng bus company na mag-drug test —at nag-negative naman.
Dapat tinanong ku’ng may ininom siyang gamot na nakakaantok. Dapat may patakaran ang bus company na siguraduhing nakasapat na tulog ang drivers bago bumiyahe. At dapat ipatupad ng awtoridad ang limitasyon sa oras ng tuluy-tuloy na pagmamaneho.
Nakakalungkot na kinakailangan pang may mamatay bago magising ang lipunan. Nu’ng Mayo 4 dalawang tao, isa ay apat na taong gulang na batang babae, ang namatay sa sagasa ng SUV sa bangketa ng NAIA 1. Nadiskubre na substandard ang bollards na ikinabit nu’ng 2019.
Mas maraming namamatay sa aksidente sa mahihirap kaysa mayayamang bansa. Mahigpit ang batas ku’ng maunlad ang lipunan.
Sa America, halimbawa, dalawang taong kulong agad ang nadadakip sa drunk driving. Mas malala kung may nabangga, nasagasaan, o nasira.
Sa Pilipinas aregluhan agad. Halos walang naparurusahan.
***
Makinig sa Sapol, Sabado, 8-10 ng umaga, DWIZ (882-AM).
- Latest
