Mathurin bumida sa Pacers sa game 3

INDIANAPOLIS — Kumamada si Benedict Mathurin ng 27 points mula sa bench para pamunuan ang In­diana Pacers sa 116-107 pagresbak sa Oklahoma City Thunder sa Game 3 at kunin ang 2-1 lead sa NBA Finals.

Kumolekta si guard Tyrese Haliburton ng 22 points, 11 assists at 9 rebounds habang may 21 markers si Pascal Siakam para sa pagbangon ng Indiana mula sa naunang 107-123 kabiguan sa Oklahoma City sa Game 2.

“We just had guys make plays after plays,” sabi ni Haliburton. “Our bench was amazing.”

Muling lalaruin ang Game 4 sa Indianapolis kung saan pakay ng Pacers na makuha ang malaking 3-1 abante sa kanilang best-of-seven championship series ng Thunder.

“This is the kind of team that we are,” ani Indiana coach Rick Carlisle. “We need everybody to be ready. It’s not always going to be exactly the same guys that are stepping up with scoring and stuff like that. But this is how we’ve got to do it.”

Umiskor si Jalen Williams ng 26 points sa panig ng Oklahoma City habang may 24 at 20 markers sina Shai Gilgeous-Alexander at Chet Holmgren, ayon sa pagkakasunod.

“We had a lot of good stretches of the game,” ani Thunder coach Mark Daigneault. “But they had more good stretches than we did — and outplayed us over the course of 48 minutes.”

Ang tinutukoy ni Daig­neault ay ang pagkamada ng Pacers ng 32 points sa kabuuan ng fourth quarter sa likod nina Mathurin, Haliburton at Siakam.

Kinuha ng OKC ang 32-24 bentahe sa first period bago umiskor ang Indiana ng 40 points sa second quarter para agawin ang 64-60 halftime lead.

Matapos mabawi ng Thunder ang isang five-point lead papasok sa fourth canto ay humataw ang Pacers para ilista ang 107-100 kalamangan sa huling dalawang minuto ng laro.

Matapos ang kanyang slam dunk ay binutata ni Obi Toppin ang layup ni Jalen Williams ng OKC para sa paglayo ng Indiana.