Pagdailos ni Imee ug Camille
Dautang balita para nilang Senador Imee Marcos ug Kongresista Camille Villar: Ilang pagbiya sa alyansa sa administrasyon ug pagpangayo sa endorsement ni Bise Presidente Sara Duterte wala katabang sa ilang kampanya. Padayong nitidlom ang suporta sa mga botante para nila.
Bugtong kalainan, segun sa kataposang survey sa Pulse Asia dayong eleksiyon karong Mayo 12, mao nga si Camille nagkumbitay sa ika-12 (ni-us-os ang suporta sa 28.3% sa Abril gikan sa 29% sa Marso) samtang si Imee natagak sa ika-15 (24.7% sa Abril gikan sa 27.6% sa Marso).
* * *
Gihimong survey niadtong Abril 20-24, usa ka semana human giisa ni Sara ang kamot nilang Imee ug Camille. Sa eleksiyon na mahibaw-an nalangay ba lang pag-abot ang kasayuran. O nakumbinser nang mga dumadapig sa mga Duterte nga oportunista silang Imee ug Camille ug dili idugang sa 10 ka orihinal nga kandidato ni kanhi Presidente Rodrigo Duterte.
Maayo na lang nga walay problema sa kuwarta silang Imee ug Camille. Kay dili nang kapaabot sa tabang sa makinarya sa administrasyon (apil ang naandang vote buying) sa kataposang mga adlaw sa kampanya.
* * *
Labing dakong tuyo ni Imee sa pagtalikod sa iyang manghod nga si Presidente Ferdinand Marcos Jr. ug sa pag-ipon sa mga Duterte mao ang pagpabangon sa iyang suporta sa Kabisay-an (diin nitibugsok siya sa ika-20 sa Pulse Asia survey niadtong Marso) ug sa Mindanao (ika-24 ra siya).
Pero gibutyag ni Pulse Asia President Ronald Holmes nga ni-us-os ang suporta ni Imee sa Ilocos. Timaan nga nasuko ang mga Ilocano sa iyang pag-amen ni Sara nga nanghulga pag-ugkat sa patayng lawas ni Ferdinand Marcos Sr.
* * *
Konsuylo nilang Imee ug Camille mao nga dili sila ray nitidlom. Nihiyos sab ang suporta sa ubang senatorial candidates, gawas nilang Bong Go (nga maoy nag-una) ug Benhur Abalos (ika-18), ug nga sikit ang ratings sa mga nag-ilog sa kataposang unom ka luna (ikapito hangtod sa ika-12).
Mosandig sila sa personal nga relasyon sa mga Marcos ug mga Villar sa lokal nga mga opisyal ug sa bloc voting sa mga dumadapig sa mga Duterte ug sa gibanabanang 1.5 milyones ka mga sakop sa Iglesia ni Cristo (INC).
* * *
- Latest
