Pangandam sa 2028
Dihang nagbitay pa sa surveys silang Kiko Pangilinan ug Bam Aquino ug ang Akbayan ug ML, gikuwestiyon ang ilang desisyon sa pagbuwag og dagan. Gisukmatan nga naghiusa unta aron mas lig-on ang ilang mga kandidatura. Gipasidan-an nga kapildehan nga mas grabe pa kay sa 2022 ang nagpaabot nila.
Dihang nikalit lang sila og sulbong sa unang mga oras sa iskutenyo sa eleksiyon sa Mayo 12, gidayeg nang ilang desisyon nga mao diay ang labing maayong taktika sa kampanya. Tungod sa panagbuwag , naabot nilang mas daghang lugar ug mas daghang botante.
-o0o-
Human sa pasiunang pagsaulog sa katalagsaon sa kadaogan nilang Bam (seguro nang No. 2), Kiko (garantisadong No. 5), Akbayan (No. 1 sa party-list) ug ML (makalingkod sa House of Representatives si Leila de Lima), nitumaw na sang mga pagduda:
Mas maayo ba untang resulta kon pulos pa nanagan sa Senado silang Kiko, Bam, de Lima, Chel Diokno, Leni Robredo ug Sonny Trillanes?; ug
Mas daghan ba untang makalingkod kon gibahin pang mga boto sa Akbayan (nga sobra ra kaayong 2.75 milyones) ug ML (nga duna lay 541,131)?
-o0o-
Ang makapakugang nga kadaghan sa mga botong nakuha nilang Heidi Mendoza (8.65 milyones) ug Luke Espiritu (6.4 milyones) gisundan dayon sa mga pagmahay:
Kon gisagop pa dayon sa Liberal Party (LP) si Heidi, maka-kampanya unta sa mas daghang lugar ug mailhan sa mas daghang botante ug mas dakong kahigayonan pagsulod sa Magic 12; ug
Kon giapil pa lang og sagop sa LP si Luke, mas daghan untang makabati ug makumbinser sa iyang mga diskurso.
-o0o-
Dili timaan sa panag-unay ug pagkabuak-buak ang mga pangutana sa ibabaw. Hinunoa, simbolo sa pagkapukaw sa panginahanglan sa mas sayo nga pagsugod og mas ambisyusong pangandam para sa sunod nga eleksiyon.
Sakto ang sinuwat sa Facebook sa letrato sa bata nga nigukod sa sakyanan ni Robredo sa kampanya sa 2022: Ang 2028 dili parte ni Leni, kon dili parte sa bata nga nikab-ot sa iyang kamot ug ubang mga bata ug ilang mga ginikanan. Nga nagkinahanglan sa mas makiangayon nga pag-atiman. Kay sulod sa daghan na uyamot nga katuigan napasagdan ang labing batakan nilang mga panginahanglan.
- Latest
