Impeachment trial ni Sara

Wala pa gani magtigom ang Senado isip impeachment court, wala pa gani makapanumpa ang mga sakop isip senator-judges, wala pa gani masugo sa Senado si Bise Presidente Sara Duterte sa pagtubag sa articles of impeachment batok niya, wala pa gani kalingkod ang mga senador nga napili niadtong Mayo 12, wala pa gani kasugdi ang impeachment trial nga gitakdang ablihan karong Hulyo 28, nikatap nang mga paneguro nga:

Ma-absuwelto si Sara kay mas daghan na siyang mga alyado sa Senado; ug

Wala pa gani seguro kon may impeachment trial bang mahimo.

Tuguting atong unahon sa pagpatin-aw ang ikaduhang kalibog: Ang gidaghanon sa mga senador nga napadaog ni Sara ug sa iyang amahan nga si kanhi presidente Rodrigo Duterte sa eleksiyon sa niaging semana walay labot sa pagka-dayon o dili sa impeachment trial.

Makanselar lang ang impeachment trial kon bakwion sa bag-ong liderato sa House of Representatives ang articles of impeachment. Nga mahimo lang kon molampos siya sa pagkumbinser sa mayoriya sa 317 ka mga kongresista sa pagpili sa iyang igsuon nga si Kongresista Paolo Duterte nga sunod nga speaker.

Nga imposibleng mahitabo kon tinuod ang pangangkon sa kampo ni House Speaker Martin Romualdez nga nipasalig nang 280 ka kongresista nga bag-o lang nakadaog sa eleksiyon sa pagpabilin niya sa puwesto.

Pero kon mabuak ang alyansa sa lima ka partido nga nagsuporta ni Romualdez, kay hagiton ang iyang liderato sa ubang mga alyado sa Malacañang nga silang Kongresista Toby Tiangco, Kongresista Albee Benites, ug Kongresista Angelo Marcos Barba, mahimong malahugay ang kamada sa House.

Ahat pa sab ang paglista kinsay mga senador nga mo-absuwelto o mo-konbikto ni Sara. May sukaranan ang pagtuo nga ang mga senador, labi na ang mga nangambisyon sa 2028, mag-agad unsa kalig-on ang mga ebidensiya batok ni Sara nga ma-presentar atol sa husay.

Kon mapamatud-an dunay binilyon ka pesos ang joint bank account sa mga Duterte ug dili matarung sa pagpasabot diin gikan ang kuwarta, ug kon dili mapakita silang Mary Grace Piattos ug ubang mga nakadawat sa confidential funds sa Office of the Vice President ug Department of Education, mahimong maglisod si Sara pagkumbinser og siyam ka senador nga modupa niya.