Patay’ng nang Gwen budget
Patay na ang P1.2 bilyones nga supplemental budget nga gipangayo ni outgoing Governor Gwen Garcia bisan pila ka adlaw na lay nahibilin sa iyang termino. Pero mahimong buhion nila pagbalik bisan unsang adlawa samtang dili pa mapupos ang iyang termino karong Hunyo 30.
Kon basehan ang kasipsip sa mayoriya sa mga sakop sa Cebu Provincial Board atol sa sesyon niadtong Lunes, ug ang pagdumili ni Garcia pag-angkon nga gilubong siya og taga liog sa niaging eleksiyon, peligro nga makamata ta og usa ka buntag nga nakalusot nang ilang maniobra.
* * *
Nabunggo ang kuwesityonableng budget tungod sa:
Kamabinantayon sa mga dumadapig ni Governor-elect Pam Baricuatro, pipila nila taga Kapitolyo nga maoy nibisto dayon sa mga dokumento, nga nipasangil dayon nga ang budget gitumong pagbasiyo sa panudlanan aron ma-inutil ang mopuling administrasyon ni Baricuatro;
Kaabtik sa pipila ka mga sakop sa media sa pagpahibawo dayon sa publiko ug pagsubay sa kontrobersiya; ug
Kaisog ni Board Member Jiembo Borgonia sa ikatulong distrito sa Sugbo sa pagdeklarar dayon sa iyang pagsupak sa budget ug pag-boykot sa special session niadtong Miyerkules, Mayo 21.
* * *
Nagpagamit ba si outgoing Vice Governor Junjun Davide sa suway nga panglaktod? Nipasangil si Borgonia nga nalapas ang mga lagda sa provincial board sa pagpatawag sa special session:
Gipadala ni Davide ang notisya sa Mayo 20, usa ka adlaw na lang sa wala pang sesyon, sa walay paghisgot pilay gipangayong kantidad; ug
Gihatagan ang board members sa mga detalye sa budget sa alas-11:58 na sa buntag sa Mayo 21, kapin duha ka oras dayong sesyon.
* * *
Tungod sa pagsaway sa publiko, napugos ang provincial board pag-uli sa budget ni Garcia niadtong Biyernes, Mayo 23. Maong wala na untay kahulogan ang resolusyon ni Borgonia nga niawhag sa paglangay sa pagtuki sa budget kay wala na may gisumiter si Garcia nga laing budget.
Bahala na kon mas kuwestiyonable ang lipatlipat nga budget, ug aron lang gyod pagpakauwaw ni Borgonia, nibotar pagbasura sa resolusyon silang: Raul Bacaltos, Stanley Caminero, Victoria Corominas-Toribio, Minuel Carmela Franco, Michael Joseph Villamor, Andrei Duterte, Glenn Soco, Sangguniang Kabataan Federation President Loren Singco ug Association of Barangay Councils President Celestino Martinez III.
* * *
- Latest
