Mga bag-ong konsehal sa Cebu City andam magkat-on

CEBU, Philippines — Nipadayag ang mga bag-ong konsehal sa Dakbayan sa Sugbo nga sila si Winston Pepito ug Nyza Archival nga andam nila nga kat-onon ang proseso sa pagpanday og balaod sa ilang unang tulo ka termino sa konseho.

Si Pepito kinsa napili nga numero uno nga konsehal sa north distrito adunay kasinatian na sa pagpangalagad isip barangay kapitan sa Barangay Bacayan.

Nasinati niya isip barangay kapitan nga medyo dugay-dugay gyud ang pagpaabot sa mga serbisyo sa katawhan gikan sa kagamhanan sama sa pagkalangay sa paghatag sa budget alang sa barangay.

Matud ni Pepito nga duha ka dekada na usab nga nagproblema ang Barangay Talamban tungod kay hangtud karon wala pa malihok ang pagpalapad sa mga dalan paingon na sa bukid mao nga kanunay nga huot ang dagan sa trapiko.

Mao kini ang gikahibulongan ni Pepito ngano nga wala kini malihok sa milabay nga mga adminstrasyon ug sutaon niya karon nga nakaangkon na siya og lingkuranan sa konseho.

Buot niya padalion og pagpatuman ang mga nangatanggong nga ordinansa tungod kay kong makahatag kini nga kaayohan sa katawhan menos na lang nga mga yango-ngo ang madawat sa gobiyerno gikan sa katawhan.

Susama sab niini ang tumong sa pinakabata nga napiling konsehal sa north distrito nga si Archival kinsa pag-umangkon ni mayor-elect Nestor Archival.

Si Archival mao ang nagrepresentar karon sa mga kabatan-onan sa siyudad ug isip pinakabata sa konseho buot niya nga i-apply ang “Listen, Learn, and Lead” diin una niyang hinabion ang mga tawo sa barangay kon unsa ang gusto nga ipaduso niini sa konseho.

Mao sab kini ang unang higayon ni Archival nga mahimong tigpangalagad sa katawhan.

Sama kang Pepito, andam usab si Archival nga tun-an ang mga pamalakad sa konseho ug kon unsa pa ang angayan nga mga ordinansa nga angayan nga ipatuman alang sa kaayohan sa kinabag-an. BDB BANAT NEWS