Transition sa Mandaue City hapsay ra – Bercede

CEBU, Philippines — Gipadayag ni outgoing acting mayor ug Vice Mayor-elect Glenn Bercede  ang hapsay nga pagtugyan sa liderato sa kagamhanan sa Siyudad sa Mandaue ngadto kang Incoming Mandaue City Mayor Thadeo Jovito “Jonkie” Ouano nga gikatakda karong Lunes Hunyo 30, 2025.

Si  Bercede miingon nga naglakip sa makita sa mga Mandauehanon sa maong adlaw  ang pagtambong sa bag-ong mayor sa flag-raising ceremony sa City Hall karong Lunes kauban ang mga outgoing official isip sa pagpakita sa kahiusahan ug malinawon nga pagtugyan sa bag-ong liderato sa kagamhanan sa maong dakbayan.

Matud pa niya nga ang malinawon ug hapsay nga pagtugyan sa liderato  sa pangagamhanan ngadto sa bag-ong adminisrasyon pagpakita kini sa iyang administrasyon andam gyud sa kahiusahan sa pagsiguro sa tinud-anay nga serbisyo publiko ug dili mapakgang ang gitiuhang kalamboan.

Si Bercede miingon nga kini maoy labing unang higayon nga adunay hapsay ug malinawon nga pagtugyan ngadto sa bag-ong liderato sa siyudad nga wala sukad nahitabo.

Dugang pa ni Bercede nga sa maong adlaw ang  Sangguniang Panlungsod session, ang pagatambonggan usab sa mga bag-ong  sakop sa konseho  ug  nalakip na sa agenda ang pormal pagtugyan sa bag-ong liderato sa konseho.

Si Bercede miingon nga kabahin gihapon nga mga panghitabo sa maong adlaw maong ang pag-asumir na sa mga bag-ong department head ug uban pa nga mga opisyal nga moasumir na sa ilang katungdanan sa tagsa-tagsa nila ka mga buhatan

Gipadayag  usab ni Bercede nga ang  incoming administration pormal  na nga nangayo og pagtugot nga mag-obserbar sa dagan  sa operasyon sa matag buhatan sa kagamhanan sa maong dakbayan. IBM BANAT NEWS