Polis patay, suspek patay SAB

CEBU, Philippines — Patay ang usa ka polis samtang napatay sab ang tawong nakapatay kaniya sa mirespondeng mga polis atol sa nahitabong pinusilay diha sa P. Del Pilar St., Barangay Poblacion, Dakbayan sa Danao, Sugbo kagahapon sa udto, Hunyo 27, 2025.

Ang nakabsan mao si Patrolman Mark Gomer Ornopia, 27, sakop sa Danao City Police Station  nga taga Barangay Ilihan sa lungsod sa Tabogon.

Samtang ang suspetsado nakuhaan og Philhealth Identification Card apan giila lang sa kapolisan sa Danao nga mao si alyas Katipay, 24, taga Toboso, Negros.

Sa pakihinabi sa Banat News kang Police Senior Master Sergeant Ry Bacordo, imbestigador sa maong kaso, gikataho nga mipalit og soft drinks ang usa ka security guard sa usa ka establisamento sa katupad nga tindahan.

Apan gikatahong kalit kining giilogan sa suspek sa iyang armas hiungdan nga naglayogay ang duha.

Nalupig ang gwardiya ug nadisarmahan kini sa suspetsado ug nidagan sa usa ka hardware.

Naatlan sab nga adunay nakaagi nga mga polis ug mga sakop sa Bureau of Jail Management and Penology (BJMP) sa Danao nakabantay sa komosyon ug dali silang niresponde.

Usa nila si Ornopia kinsa gikatahong naunhan pagpusil sa suspek ug naigo kini sa ulo.

Gibawsan sa pagpusil sa mga BJMP personnel ang suspek hinungdan sa pagkahagba niini. Gidala sa Provincial Hospital sa Danao si Ornopia apan paglabay sa pipila ka minutos nakabsan kini sa kinabuhi.

Sa pagkakaron, gipalawman pa ang imbestigasyon sa kapolisan sa Danao bahin sa maong hitabo ilabi na ang pagsuta kun nganong nangilog og armas ang suspek.--Anthony Despi, CNU Intern, IBM BANAT NEWS