Dul-an sa 300 ka residente apektado kong ipasirado ang pribadong luna

CEBU, Philippines — Sugod karong adlawa, Mayo 28, 2025 hingpit nang pasirad-an sa Altarica Corporation ang gipanag-iya nga pribadong luna sa Purok 6 sa San Miguel sa Barangay Apas, Dakbayan sa Sugbo.

Plano sa Altarica Corporation nga ipadayon ang himuon nga commercial establishments diha sa maong luna.

Matud sa pangulo sa Cebu City Disaster Risk Reduction and Management Council  Ramil Ayuman nga butangan na kini og gate sa Altarica Corporation ang naglibot sa tibuok lugar gikan sa main road ug maglakip niini ang Purok 6 diin supak niini ang mga residente tungod kay wala na kini kaagian.

Gikataho nga 297 ka residente sa lugar ang maapektohan sa maong kausaban lakip niini ang lima ka pasyente nga nagpadayon sa chemotherapy ug dialysis, 26 ka mga senior citizens, lima ka Persons with Disabilities, 128 ka indibidwal nga hamtong na ang pangedaron, 38 ka bata nga nagpangedaron sa 11 hangtud sa 18-anyos, 45 ka bata nga nagpangedaron ngadto sa 10-anyos paubos, 38 ka mga indibidwal nga nanag-iya og motorsiklo, 12 ka indibidwal nga nanag-iya og 12 four-wheel vehicles.

Sa maong pagpasira maapektohan usab niini ang pumping station nga gibutang sa Metropolitan Cebu Water District.

Si Ayuman nibutyag nga nakighinabi usab siya sa tagdumala sa Altarica Corporation apan dili na nila paagian og sakyanan ang luna kong dili kini authorized vehicle, amabulansiya o kong walay mahitabong emerhensiya.

Ang Altarica Corporation nipadala og notisya ngadto sa mga residente diin ilang gipahibalo nga nga mohimo og alternatibong dalan alang sa mga sakyanan tungod kay ang ilang gihatag nga dalan sa kilid sa tukuron nga gate alang ra sa mga tawo ug dili pang sakyanan ug sa mga motorista.

Samtang ang mga residente nihangyo usab sa Altarica Corporation kong mamahimo moabang sila og luna nga pwede nilang kaagian sa mga sakyanan apan wala mosugot ang tagdumala.

Gibutyag ni Ayuman nga ang luyo nga bahin sa Altarica Corporation usa kini ka luna nga iya sa gobiyerno hinungdan nga nangayo og tabang si Ayuman ngadto kang Mayor Raymond Alvin Garcia sa angayan nga buhaton aron adunay mas dali nga agianan ang mga residente nga nagpuyo sa luyo nga pasirad-an nga luna. BDB BANAT NEWS