PBA Final Four mosikad na

CEBU, Philippines — Magsugod na ang upat ka teams sa ilang kampanya nga mobira og luna sa kampiyonato sa dihang ang PBA Season 49 Philippine Cup semifinals mo-arangkada na karong adlawa (Miyerkules, Hunyo 25) didto sa  SM Mall of Asia (MOA) Arena sa Pasay City.

Ang  TNT Tropang 5G  mosakbang batok sa Rain or Shine Elasto Painters sa pasiunang duwa sa ilang best-of-seven series nga gikatakda sa alas-5 sa hapon.

Sa ilang tapad, ang TNT maoy inilog gumikan kay gibuntog nila ang Rain or Shine sa miagi nilang duha ka engkwentro sa semis sa Governors Cup ug sa Commissioner's Cup sa parehong 4-1 nga      baraha.

Samtang ang Tropang 5G naglaraw nga maka-Grand Slam ning seasonm, ang E-Painters nagtinguha nga makatikang sa finals sa unang higayuon sukad sila nakampiyong niadtong 2016 Commissioner's Cup.

Sa main game sa alas 7:30 sa gabii, ang San Miguel Beermen ug ang Barangay Ginebra Kings mosikad sa kaugalingon nilang serye.

Usa kini ka dumot nga rematch sa sa ilang panag-abot sa Governors' Cup semis.

Lahi na hinoon ang sitwasyon karon gumikan kay moasdang sila sa gubat nga wala nay mga imports.

Sandigan sa Beermen mao sila si June Mar Fajardo, CJ Perez, Moala Tautuaa, Don Trollano, Chris Ross, Marcio Lassiter, Juami Tiongson, Jericho Cruz ug Rodney Brondial.