US NMESIS papuputukin sa Kamandag exercise

MANILA, Philippines — Kung dati’y pang-display lamang, papuputukin na sa maritime strike ang US Navy-Marine Expeditionary Ship Interdiction System (NMESIS), isang American made anti-ship missile system sa idinaraos na Kamandag exercise sa susunod na linggo.

“The deployment of the NMESIS, which is the Navy-Marine Expeditionary Ship Interdiction System, is part of Kamandag. Its objective is for us to be able to conduct joint operations or combined operations with other marine corps or other nations,” pahayag ni Philippine Navy spokesperson Captain John Percie Alcos.

Sinabi ni Alcos na ang NMESIS ay gagamitin sa maritime strike sa Hunyo 1 at isasagawa ang maritime strike sa Burgos, Ilocos Norte.

Hindi naman direktang tinukoy ng opisyal kung ang NMESIS ay aktuwal na magsasagawa ng ‘live fire’ o ‘dry firing’ lamang ang ipapamalas nito. Ang dry firing ay pagpaputok ng armas na walang bala.

“Whether it will be fired or not depends on the actual situation or actual criteria that will be met on the day of the maritime strike demonstration,” ayon kay Alcos sa press briefing.

Umarangkada ang Kamandag nitong Lunes na magtatapos hanggang Hunyo 6.

Nilahukan ang war drills ng 4,000 miyembro ng PMC at USMC na magsasagawa ng joint military exercises sa iba’t-ibang lokasyon sa Nort­hern Luzon Command, Western Command at Western Mindanao Command gayundin sa ilang mga piling lugar sa Cavite at Manila.

Lalahok sa KAMANDAG ang Japan, South Korea, Britain habang magsisilbing observers ang Australia, Bahrain, Canada, France, Indonesia, Netherlands, New Zealand at Thailand.