Kabilin ni Gwen

Dihang gi-inutil ni outgoing Governor Gwen Garcia ang provincial hospitals sa pagbalik niya sa Kapitolyo niadtong 2019, pinaagi sa pagtaktak sa mga doktor ug nurses ug paglaslas sa budget, naguol ang mga Sugboanon. Labi na ang labing kabos nga mga masakiton nga wala na matambali.

Inig kanselar ni Governor-elect Pam Baricuatro sa SuroySuroy Sugbo ug Pasigarbo sa Sugbo, labi na kon gamitong pundo pagpalambo sa provincial hospitals, malipay’ng mga Sugboanon. Apil nang mga mayor nga makalingawas gikan sa wala kinahanglanang pagwaldas sa minilyon ka pesos nga buhis sa katawhan.

-o0o-

Gipahimungtan ni Garcia ang provincial hospitals, bisan kon nakahatag og matinud-anong serbisyo ngadto sa mga pasyente sa labing lagyo nga mga barangay, kay nahimong simbolo sa malampusong liderato nilang kanhi Gobernador Junjun Davide ug kanhi Bise Gobernador Agnes Magpale.

Gidumtan niyang mga doktor, labi nang mga espesyalista, nga gawas nga gi-insulto kay giisip nga sobrang suweldo gipalagpot sa puwesto ug gi-outsource pinaagi sa placement agencies. Dihang walay nangaplay, kay ang baratilyong suweldo nalupig sa dinaliang panginahanglan sa pribadong mga ospital, ayha pa direktang gi-hire isip kontraktuwal nga mga trabahante.

-o0o-

Bisan nabantang nga ang mas gamay’ng budget sa provincial hospitals niresulta sa pagtibugsok sa serbisyong medikal–nga bisan gapas kinahanglang paliton na sa gawas ug niawas nang mga pasyente nga Vicente Sotto Memorial Medical Center–nagpaugat si Garcia sa iyang pagpabaya.

Walay luna ang nagtiyabaw nga mga masakiton sa iyang kasingkasing. Nga gilumsan sa kalipay matag kakita sa higante niyang ngalan ug dagway sa tarpaulins nga giladlad sa kadalanan ug matag kadungog sa pekeng abiba sa tikig niyang sayaw.

-o0o-

Kon tinud-on ni Baricuatro ug abagan siya sa mayoriya sa mga sakop sa Provincial Board, labihan kamapuslanon ang pag-kanselar sa kabilin sa kiat-kiat ni Garcia:

Ang P300 milyones nga budget sa Pasigarbo karong tuiga (mas dako sa P255 milyones nga gasto sa niaging tuig) makatukod og bag-ong 100-bed hospital, o maka-palit og tambal ug kahimanan, o maka-hire og dugang mga doktor ug nurses sa provincial hospitals; ug

Ang kapin P500 milyones nga gasto sa mga syudad ug mga lungsod sa SuroySuroy magamit para sa mas dinaliang panginahanglan sa pagkaon, kahimsog, edukasyon ug panginabuhi sa mga Sugboanon.

[email protected]