Nakaabot ra gyud tawon ang bugas

Human sa tulo ka tuig nga pagpinaabot sa katawhang Pilipinhon, natuman na gyud ang saad sa Marcos administration nga mapalit ang bugas sa tag P20 ang presyo matag kilo diin gilusad kini sa Cebu Provincial Capitol.

Ang programa gitawag og P20 Benteng Bigas Meron na o PBBM, a Fulfillment of Promise. Gihangop kini sa mga tawo kinsa sayong buntag pa lang nagpaabot sila sa Capitol ground kay lagi makapalit na sila sa baratong bugas.

Alang sa mga tawo nga nadugay man ang pag-abot sa bugas ok lang basta nakaabot ra gyud sa kataposan. Sagad sa akong naestorya walay silay reklamo kay sila man usab ang nakapahimulos niini.

Nisamot ang ilang kalipay dihang nahtagan na sila sa ilang gipangandoy nga tag P20 kada kilo sa bugas, maayo nalang mainat inat ang ilang budget. Dagko kaayo ang ilang ngisi nga nagbitbit sa napalit nga bugas. In fairness sa bugas dili man ingon niana ka puti pero lami ug walay baho tungod kay premium rice man kini.

Gipakita sa mga opisyal sa kagamhanan nga maayo ang kalidad sa bugas pinaagi sa paglung-ag niini ug paglabay sa pipila ka gutlo naluto na ang kan-on ug gipang gipanglamoy apil si Secretaru Laurel ug Governor Garcia diin giparesan nila og binisdak nga sud-an, perting busoga nila.

Makaingon kita nga maayo kong magpadayon kining programaha ug dili lang limitado niadtong mga adunay identification magmatuod nga sakop sa vulnerable sector kay sa tinuod lang adunay mga tawo nga walay mga ID pero mas deserving pa nga makapalit sa bugas nga barato sama nianang nagpuyo sa aseras.

Dako atong pasalamat nga natilawan na sa atong pipila ka mga kaigsonan ang saad nga bugas sa dihang nangulitawo pa si PBBM sa mga Filipino aron maloklok siya sa pwesto. Imposible man gyud to nga saad apan napangitaan niya og pamaagi bisan alang sa uban band aid solution lang pero nahitabo gyud.

Ang pangutana karon hangtud kanus-a kining programaha? basin og kutob lang kini hangtud mahurot ang supply sa bugas sa NFA ug aduna ba usay igong kwarta ang mga LGU nga ikatampo sa pagpatuman niini, maayo kadtong mga LGU nga kwartahan apan kadtong wala, mag nganga sila hanggab sa hangin.

Dili malikayan nga adunay pagduda nga gigamit lang kini sa politika kay gitunong man sa eleksyon, gitayming gyud? bisan unsa man ang rason basta nabulahan ang mga nagkinahanglan, ang importante masustinehan kini bisan wala na ang eleksyon kay dili lang baya karong panahona gipanggutom ang mga tawo kon dili sa tanang panahon.

 Unta magpadayon nga premium rice pirme ang ibaligya kay basin baya og kutob lang kini sa launching ug inig sunod kadto nang mga adunay baho. Hinuon gipasalig man nila pagkaon gyud sa tawo ang mapalit sa atong mga kaigsoonan, kini maoy atong tuohan.