Suarez napakyas vs Naverrete sa kontrobersiyal nga desisyon

CEBU, Philippines — Kampo sa Pinoy mo-protesta, rematch lagmit mahitabo

Ang tam-is untang koronasyon nahimong usa ka pait nga kapildihan alang sa Pinoyng boksidor nga si Charly Suarez.

Kini human ang 36-anyos nga kanhi Olympian napilde pinaagi sa kontrobersiyal nga technical decision batok ni WBO super featherweight champion Emanuel Navarrete didto sa Pechanga Arena sa San Diego, California kagahapong adlawa (Dominggo, Mayo 11 oras dinhi sa Pilipinas).

Si Navarrete milampos pagdepensa sa iyang titulo human ang away giundang sa ikawalong hugna gumikan kay ang Meksikanong kampiyon dili na makapadayon kay nakahiagum og dakong gisi sa wala niyang kilay.

Ang gisi, nga naangkon ni Navarrete sa ikaunom nga hugna, gideklara ni reperi Edward Collantes nga gumikan sa aksidenteng panagbangga sa ulo kon headbutt.

Apan klaro kaayo sa replay nga usa ka solidong left straight ngadto ni Naverrete ang nakagisi sa nawong sa Meksikano.

Kon ugaling mihukom pa ang reperi nga ang gisi ni Naverrete nagagikan sa usa ka lehititomong suntok, si Suarez unta maoy mananaog pinaagi sa TKO (technical knocout) sa dihang gihunong ang ilang sangka.

Tungod sa desisyon ni Collantes, gidetermina ang mananaog pinaagi sa scorecards sa tulo ka mga judges diin si Naverrete nakaipsot sa iskor nga 78-75 ug 77-76 duha ka higayon aron inaton ang iyang rekord ngadto sa 40-2-1 uban ang 32KOs.

“I’m sad, but it’s part of the game,” matud pa ni Suarez human makatilaw sa una niyang pilde sud sa 19 ka away uban ang 10KOs. “I want a rematch.”

Si kanhi Ilocos Sur Governor Luis "Chavit" Singson, ang manedyir ni Suarez, miprotesta sa resulta sa away ug nagkanayon nga ila kining i-apela sa WBO.

“Clear punch. Maliwanag pa sa sikat ng araw dito sa Pilipinas. Charly was robbed of a victory and boxing fans, even non-Filipinos, know that. We will file an appeal. Charly deserves the win and the world title,” dason pa ni Singson.