Tuburan Inter-Collegiate Tournament mosikad na

CEBU, Philippines — Ang 1st Mayor Aljun Diamante Inter-Collegiate Basketball Tournament mo-arangkada na karong adlawa (Sabado, Mayo 24) uban ang duha ka kulbahinam nga mga duwa diin ang Cebu Schools Athletic Foundation, Inc. (CESAFI) Grand Slam champion University of the Visayas (UV) Green Lancers ug ang University of Cebu (UC) Webmasters makigsangka batok sa managlahing kontra didto sa Tuburan covered court sa lungsod sa Tuburan, amihanang kasadpan nga bahin sa Sugbo.

Ang Webmasters mosakbang batok sa Cebu Institute of Technology-University (CIT-U) Wildcats sa pasiunang duwa nga gikatakda sa alas-6 sa gabii samtang ang Lancers makigharong batok sa Benedicto College (BC) Cheetahs sa main game sa alas-8 sa gabii.

Lain pang duha ka CESAFI teams ang mopakita'g aksiyon ning usa ka semanang torneyo nga nagdalit og kinatibuk-ang P360,000 nga premyo.

Uban sa UC ug CIT-U sa Bracket B ang University of San Jose-Recoletos (USJ-R) Jaguars, samtang UV ug ang Benedicto giduyogan sa University of Southern Philippines Foundation (USPF) Panthers sa Bracket A.

Moduwa sila og single round robin sa eliminasyon diin ang Top 2 teams matag bracket moabante sa crossover semifinals. Ang makalahutay sa tinagakay nga mga duwa magbangga alang sa titulo.

Ang makampiyon mobulsa og P120,000 samtang ang mopahiluna sa ikaduha ngadto sa ikupat nga dapit mokubra og P80,000, P60,000 ug P40,000.

Ang duha ka teams nga nangatagak makadawat og P15,000 matag usa.